Mavsum oralig'ida jamoani tark etgan o'yinchilar o'rnini to'ldirish maqsadida Bekobodning “Metallurg” klubi rahbariyati jamoaga oliy liga havosidan bahramand bo'lgan ikki nafar iste'dodli o'yinchilarni taklif etdi.
O'tgan mavsum Toshkent viloyatining “Olmaliq” jamoasida faoliyat olib borgan yarim himoyachi Jahongir Abdumo'minov hamda Jizzaxning “So'g'diyona” jamoasi hujum chizig'ida to'p surgan Jasurbek Hakimovlar “Metallurg” jamoasiga kelib qo'shildi. Mazkur o'yinchilarning o'zlari hamda avvalgi klublari bilan kelishuvlar amalga oshirildi. Bugundan mashg'ulotlarga kirishgan yangi o'yinchilar ertaga “Sho'rtan”ga qarshi o'tkaziladigan nazorat o'yinida ilk marta “Metallurg” libosida maydonga tushishlari kutilmoqda. Quyida “Metallurg”ning yangi a'zolari haqida qisqacha ma'lumot beramiz:
Jahongir Abdumo'minov 23 yoshda. 1993 yilning 9 fevralida tavallud topgan. Yarim himoyachi. Mamlakat chempionati oliy ligasidagi faoliyatini “Mash'al” futbol klubida boshlagan. 2010 yildan 2015 yilgacha muborakliklar sharafini himoya etgan. O'tgan mavsum esa poytaxt viloyatining “Olmaliq” jamoasida to'p surdi. Shu yillar mobaynida Abdumo'minov 70 ta uchrashuvda maydonga chiqib, raqiblar darvozasiga 7 ta to'p kiritdi. Beshta mavsumda 16 marta sariq kartochka “ishladi”.
Jasur Hakimov qtidorli hujumchilardan biri. 21 yoshda. 1994 yilning 24 mayida tug'ilgan. Hujumchi. Oliy liga uchrashuvlarida 2014 yildan buyon qatnashib kelayapti. “So'g'diyona” jamoasida 2014-15 yillar mobaynida 26 o'yinda maydonga chiqib, raqiblari darvozasiga 10 ta gol kiritgan. Hakamlar 7 marta unga chariq kartochka ko'rsatishgan.
— deya xabar beradi uff.uz nashri.