Hayot turli-tuman tasodiflardan iborat. Ular ba'zan baxtsizlikka, ba'zan esa muvaffaqiyatga, mashhurlikka olib keladi. Masalan, daraxt ostida uxlab qolgan Isaak Nyuton boshiga tasodifan uzilib tushgan olma tufayli butun olam tortishish qonunini kashf etdi, suv to'la vannada cho'milish esa Arximedning solishtirma sig'im qonunini yaratishiga turtki bo'ldi.
Ana shu tasodiflar bu ikki olimni dunyoga tanitdi. Futbol olamida esa ayrim iqtidor egalari qandaydir tasodif tufayli nufuzli jamoa safidan joy olish imkoniyatidan mahrum bo'lishgan va boshqa yo'lni tanlashgan, natijada dunyo miqyosidagi yulduzlar darajasiga ko'tarilishgan. Marhamat, olis o'tmishda emas, shu kunlarning qahramonlari bilan tanishing.
Genrix Mxitaryan
Qachon va qaysi jamoaga o'tmagan: 2009 yilda, TsSKAga.
Armanistonlik yarim himoyachini hozir nafaqat bundesliga, balki Evropa futbol olami eng yaxshi assistentlardan biri sifatida e'tirof etadi. Bundan 7 yil muqaddam Genrix Armanistonning «Pyunik» klubida to'p surardi. Tasodif bu futbolchining TsSKAga o'tishiga imkon bermadi. Yo'q, Genrix taklifni rad etgani yo'q, shunchaki, Moskvadagilar uni taklif etishmadi. Armiyachilarda Mxitaryanni 300 000 evro evaziga xarid qilish imkoniyati bor edi. Lekin Roman Babaev bu futbolchi jamoaga manfaat keltira olmaydi, degan qarorga kelgandi.
Oradan bir yil o'tgach, Genrix «Metallurg» orqali Donetskning «Shaxtyor»idan joy oldi. Konchilar jamoasidagi ishonchli o'yinlari evaziga «Borussiya» D.ning e'tiborini tortdi. Mxitaryan uchun jamoa tarixidagi rekord xarid - 27 mln.ni sarflagan nemislar hozirda ana shu xarajatning mevasidan bahramand bo'lishyapti. Muxlislar tomonidan «Mikki» deb erkalanadigan yarim himoyachi Mario Gyottsening o'rnini bosmoqda. Undagi yuksak iqtidorni nafaqat Roman Babaev tan olmayapti, xolos.
Anxel Di Mariya
Qachon va qaysi jamoaga o'tmagan: 2007 yilda, «Moskva»ga.
Jamoa tarqatib yuborilishidan 3 yil avval «shaharliklar» Anxel Di Mariyaning faoliyatini barbod qilishlari ham mumkin edi. 19 yoshli argentinalik iqtidor sohibi uchun moskvaliklar 1 mln. evroni taxt qilib qo'yishgandi. Hozirku Anxel transferlarning umumiy qiymati bo'yicha jahon rekordchisi, lekin u paytda tajribasiz g'o'r yigitcha edi. Shu bois, «Moskva» taklifiga rozilik bergandi. Lekin kutilmaganda ishga «Benfika» aralashib, Di Mariya uchun «Moskva»dan 6 baravar ko'proq mablag'ni taklif etdi. Shu tariqa argentinalik yarim himoyachi omadsizlik ko'chasiga kirish xavfidan omon qoldi.
Darvoqe, «shaharliklar» bundan avval ham Rossiyaga taniqli yulduzni olib kelishga urinib ko'rish, «Real»da to'p surayotgan Luish Figuni ko'ndirish uchun Madridga Ektor Brakomontni elchi qilib yuborishgandi. Ammo Figu «Inter»ni «Moskva»dan afzal ko'rgandi.
Robert Levandovski
Qachon va qaysi jamoaga o'tmagan: 2008 yilda «Sibir»ga
Agar shu tasodif bo'lmaganida, polshalik mashhur hujumchi Myunxenda emas, Novosibirsk yashil maydonlarida javlon urayotgan bo'lardi. Polshaning kamtarin «Znich» klubida gollarni «konveyer»ga qo'ygan 19 yoshli hujumchi «Sibir» skautlarining etiboriga tushgan, lekin moliyaviy muammoalar tufayli tarnsfer amalga oshmay qolgandi. «Lex» esa arzimas 800 000 evro evaziga uni o'z safiga qo'shib oldi. Aynan shu jamoadagi o'yinlari orqali futbolchi Yurgen Kloppning nazariga tushdi.
Natijada, faqat 100 foizli vaziyatlarni golga aylantiradigan Levandovski ijodkor hujumchiga aylandi. «Real» darvozasiga yo'llagan bitta aniq zarbasi uni dunyoga tanitdi. Xullas, qachonlardir «Sibir»dan kelgan taklifni hujumchi allaqachon unutib yuborgan bo'lsa, ajabmas.
Kaka
Qachon va qaysi jamoaga o'tmagan: 2003 yilda TsSKAga
«San-Paulu» bilan shartnomasi yakunlangan yarim himoyachida Evropaga yo'l olish imkoniyati tug'ilgandi. O'shanda u jahon chempioni degan sharafli unvon sohibi edi. Ichki birinchilikda 100tadan ko'proq uchrashuv o'tkazgandi va risoladagidek sermahsullikni namoyish etgandi. Evgeniy Ginerning aytishicha, armiyachilar Kaka bilan barcha masalalarda bir to'xtamga kelishgan, faqat futbolchi atigi 3 kungina sabr qilishlarini iltimos qilgandi.
Chunki u «Milan»dan ham umidvor edi. Oxir-oqibat, «rossonerlar» tarkibida faoliyatini tamomlayotgan Leonardoning tavsiyasi bilan italiyaliklar braziliyalik futbolchi uchun 9 mln. evro taklish qilishdi. Qisqa vaqt ichida Kaka «Milan»ning etakchisiga aylandi, EChLda g'olib chiqdi, «Oltin to'p»ni qo'lga kiritdi. Keyin esa «Real»ning Zayniddin Zidandan keyingi ikkinchi rekord transferchisiga aylandi.
Davomi InterFUTBOL gazetasi blogida.
— deya xabar beradi uff.uz nashri.