“Lokomotiv” futbolchilari bilan muloqot qilishni, ular bilan esdalik rasmga tushishni, klub stadionida sayr qilishni, Osiyo chempionlar ligasi oldidan fubolchilar ishtirokidagi ochiq mashg'ulotni tomosha qilishni istaysizmi? Biz sizga bu imkoniyatni yaratib beramiz. 18 fevral – payshanba kuni “Lokomotiv” yangi futbolchilarni tanishtiruv marosimini o'tkazadi. Sevimli futbolchilaringiz safiga 2016 yilgi mavsum uchun endilikda Server Jeparov, Kaxi Maxaradze, Sherzod Fayziev, Sadriddin Abdullaev kabi yigitlar qo'shilishdi. Ular “Lokomotiv”ning navbatdagi muvaffaqiyatlariga o'z hissalarini qo'shish uchun klub bilan shartnoma imzolashdi. 18 fevral soat 11:00 da “temiryo'lchilar”ning 2016 yilgi mavsum uchun yangi liboslari taqdimoti o'tkaziladi. Shuningdek, yangi futbolchilar rasman tanishtiriladi, ular ishtirokida matbuot anjumani bo'lib o'tadi. OAV hodimlari o'zlarini qiziqtirgan savollarga “Lokomotiv” futbolchilari va rahbarlaridan javob olishlari mumkin. Shuningdek, 11:30 dan boshlab “Lokomotiv” muxlislari stadionga qo'yiladi. Ular matbuot anjumanidan keyin nafaqat yangilar, balki mashg'ulot uchun chiqib kelayotgan klubning istalgan futbolchisi bilan rasmga tushishlari, dastxat olishlari mumkin bo'ladi. Futbolchilarning harakatlarini stadionning eng yaxshi sektorlarida tomosha qilishlari uchun ruxsat etiladi. Bir kunlik aktsiyadan keyin ijtimoiy tarmoqlarda e'lon qilingan va klub atributlari aks etgan fotosuratlar saralab olinadi. Ularning eng originali aniqlanib, mavsumdagi ilk bellashuv – “Lokomotiv” – “Al-Ittixod” o'yini uchun eng yaxshi sektordan ikki kishilik chipta taqdim etiladi. Imkoniyatni qo'ldan boy bermang.
— deya xabar beradi uff.uz nashri.