Futzal bo'yicha Osiyo chempionati chorak finali oldidan terma jamoalar bosh murabbiylari ishtirokida matbuot anjumani  bo'lib o'tdi. Matbuot anjumanining dastlabki qismida O'zbekiston, Iroq, Avstraliya va Tailand terma jamoalari bosh murabbiylari ishtirok etdilar. Avvaliga murabbiylardan musobaqa haqidagi fikrlarini bildirish so'raldi.
Iroq: O'zbekiston terma jamoasi juda kuchli. Biz bu o'yin juda qiyin o'tishini bilamiz. O'zbekiston juda kuchli murabbiyga ega va o'z maydonida to'p suradi. Shunga qaramay biz bu o'yinda g'alaba qozonishga harakat qilamiz.
O'zbekiston: Iroq tarkibida klublar o'rtasidagi jahon chempionatida ishtirok etgan 12 nafar futzalchi bor. Ular birinchi turda Xitoyni 6:0 hisobida mag'lubiyatga uchratishgan. Har ikki jamoa ham jahon chempionatida ishtirok etishni istaydi. Shu sababli o'yin juda shiddatli va qiziqarli o'tadi, deb o'ylayman.
Avstraliya: Biz ertaga Tailandga qarshi o'ynaymiz. Bu jamoa guruhdagi uchta o'yinda birorta mag'lubiyatga uchramadi. Shunday ekan, raqib juda kuchli. Ammo biz ham o'z o'yinimizni namoyish eta olsak, albatta g'alaba qozona olamiz.
Tailand: Men Avstraliya terma jamoasi bosh murabbiyini yaxshi taniyman. Biz bir necha bor ko'rishib, muloqotda bo'lganmiz. Shunday ekan, ertaga qanday natija qayd etilishidan qat'iy nazar, u bilan do'st bo'lib qolishimizga umid qilamiz.
- O'zbekiston terma jamoasi tarkibida to'rt nafar futzalchi shamollab qolgan edi. Ularning ahvoli qanday?
- Shamollab qolgan futbolchilar ertaga maydonga tushadi. Balki ular 100 foiz uchrashuvga tayyor emasdir, ammo ertaga bo'ladigan o'yin juda muhim ahamiyatga ega va ular buni his qilib turibdilar. Shu sababli ertaga O'zbekiston to'liq tarkibda o'ynaydi.
- Ertaga bo'ladigan o'yinda O'zbekiston favoritmi yoki siz boshqacha fikrdamisiz?
- Bu o'yinda O'zbekistonni favorit deb ayta olmayman. Biz o'yindan o'yinga kuchayib bormoqdamiz. Nasib qilsa ertaga eng yaxshi o'yinlarimizdan birini namoyish qilishga harakat qilamiz. Umid qilamizki bu o'yinda g'alaba qozonib, jahon chempionati yo'llanmasini qo'lga kiritib, muxlislar oldida yuzimiz yorug' bo'ladi.
- Savolim Iroq terma jamoasiga. Ertaga bo'ladigan o'yinda O'zbekiston terma jamoasi muxlislari bosimi sizga qay darajada ta'sir o'tkazadi?
- Biz o'zbekistonlik muxlislarni juda hurmat qilamiz. Ular ajoyib tarzda nafaqat o'z terma jamoalari, balki boshqa jamoalarni ham qo'llab turibdilar. O'zbekiston o'ynamagan o'yinlarda albatta. Ertaga esa ular bor kuchlari bilan o'z suyuklilarini qo'llashlari turgan gap. Ammo bu holat bizga hech qanday ta'sir o'tkazmaydi. Biz bunga tayyormiz.
- Savol Iroq terma jamoasiga. O'zbekiston va Iroq 2007 yilda o'zaro to'qnash kelgan edi. O'sha yili o'ynagan futzalchilardan ayni vaqtda ham tarkibda bormi va o'tgan vaqt davomida jamoangiz qay darajada o'zgardi?
- 2007 yildan buyon jamoamiz ancha o'zgardi. Buni klublar o'rtasidagi jahon chempionatida futzalchilarimiz ishtirok etganidan ham bilsak bo'ladi. Ertaga bo'ladigan o'yinda ham 2007 yilda bo'lgani kabi qiziqarli o'yin guvohi bo'lamiz, deb umid qilaman.
- Savolim Avstraliya terma jamoasi bosh murabbiyiga. Ertaga bo'ladigan o'yinda Tailand tarkibidagi xavfli futzalchilarni to'xtatib qolish qay darajada muhim?
- Biz alohida futzalchi emas, balki butun jamoaga qarshi maydonga tushamiz. Shu sababli alohida futzalchi emas, balki butun jamoani to'xtatish haqida o'ylaymiz.
- Ertaga bo'ladigan o'yinda penaltilar seriyasi o'tkazishga tayyorgarlik ko'rdilaringmi?
Iroq: Mashg'ulotlar davomida penaltilarni ham sinovdan o'tkazganmiz. Albatta chorak final baxsida penaltilar seriyasi ham bo'lishi mumkin. Shuning uchun darvozabonlarni ham alohida tayyorladik. Umuman, penaltilar seriyasiga musobaqa oldidan ham yaxshi tayyorgarlik ko'rganmiz.
O'zbekiston: Bunga to'liq tayyormiz. Penaltini kim tepadi, darvozada kim turadi - barchasi aniq. Umuman, bunga biz musobaqa boshlanishidan oldinoq tayyor bo'lib ulgurganmiz.
Avstraliya: O'yinni penaltilar seriyasiga qadar olib bormaslikka harakat qilamiz. Ammo buning imkoni bo'lmagan taqdirda, penaltilar tepishga to'liq tayyormiz.
Tailand: O'ylaymanki o'yin penaltilar seriyasigacha bormaydi. Nima bo'lgan taqdirda ham, biz oxiriga qadar kurashamiz.
- Ertaga yutqazadigan jamoalarda JChga chiqish uchun yana bir imkoniyat, ya'ni musobaqaning beshinchi jamoasi bo'lish imkoni qoladi. Bu imkoniyatdan qanchalik foydalanishni rejalashtirgansiz?
Tailand: Bizning asosiy maqsadimiz - to'g'ridan to'g'ri yo'llanmagan ega chiqish. Agar buning imkoni bo'lmagan taqdirda, keyin beshinchi o'rin uchun kurashamiz.
— deya xabar beradi uff.uz nashri.