Futzal bo'yicha o'tkazilayotgan Osiyo chempionati yarim finali doirasida kechgan O'zbekiston - Tailand o'yinidan so'ng Xose Mendez matbuot anjumanida ishtirok etdi va jurnalistlar bilan muloqotda bo'ldi.
- Biz Tailand terma jamoasiga qarshi og'ir o'yin bo'lishini bilardik. JChga chiqqach, bosimdan forig' bo'lgan edik. Shunga qaramasdan himoyada yaxshi o'ynasakda, hujumda o'zimizni ko'rsata olmadik. Menimcha bugun har ikki jamoa ham g'alabaga munosib edi. Shu tomonlama olib qaraydigan bo'lsak, ikki kuchli jamoa ishtirokidagi o'yinda biz g'alaba qozondik.
-Jamoangiz bunday o'yin bilan finalda qanday to'p suradi, deb o'ylaysiz?
- Oldin Eron Vetnamga qarshi kechadigan yarim final o'yinida g'alaba qozonib olsin, keyin bu haqida qayg'uramiz (zalda kulgu)... Jiddiy oladigan bo'lsak, finalda kim o'ynashidan qat'iy nazar, u Eron bo'ladimi yoki Vetnam, o'yindan imkon qadar lazzat olishga harakat qilamiz. Biz chorak finalga qadar bo'lgan bosimdan forig' bo'lganmiz. Biz shunchaki hujumdagi o'yinimizni ham kuchaytirib, himoyada barqarorlikka erishishimiz lozim. Shundagina nimagadir erishsa bo'ladi.
- Pley off bosqichida jamoangiz erkin o'ynay oldimi?
-Ha. Shunday deb ayta olaman. Biz bugun ancha erkinroq harakat qildik. Ba'zan shunday bo'ladiki, xatolarni tuzatish imkoni bo'ladi. Bugun darvozabon o'rniga beshinchi o'yinchini maydonga tushirib, vaziyatni tenglashtirdik. Ammo har bir o'yinda ham buning iloji yo'q.
-Feruz Faxriddinov bugun o'ynamadi. Tyugaev esa mutlaqo o'ynagani yo'q. Biroq ular penaltilar seriyasida qahramonlik ko'rsatishdi. Ular shunga maxsus tayyorlanganmidilar.
- Biz har qanday vaziyatga oldindan tayyorgarlik ko'rgan edik. Klim Tyugaev penaltilar va 10 metrlik zarbalarni qaytarish bo'yicha mutaxassis. Faxriddinovga keladigan bo'lsak, u to'pga yaqinlashgani hamono gol urishini sezdim. U avvalroq Bahodir Ahmedov bilan bu borada kelishib qo'ygan ekan. Aslida bu zarbani Choriev yo'llashi kerak edi. Ammo Feruz mas'uliyatni o'z zimmasiga oldi va penaltini tepdi. Buning uchun ulkan iroda kerak va Faxriddinov o'z ishini ajoyib tarzda uddaladi.

- Sharipov va Shlema maydonga tushmadi, Irsaliev sariq oldi. Bu yo'qotishlar finalda halal bermaydimi?
- Finalda o'ynashga hamma tayyor. Ammo oldindan kimni maydonga tushirishni bilmaysan. Futzalda shunday, qaysidir tarkibni maydonga tushirasan va barchasi o'z o'rnidaligini ko'rib, ularni almashtirmaslikka qaror qilasan. Keyingi o'yinda kim maydonga tushishini hozir bilmayman, ammo siz aytgan futzalchilarning barida maydonga tushish imkoni bor.

— deya xabar beradi uff.uz nashri.