Futzal bo'yicha o'tkazilgan Osiyo chempionati finalida O'zbekiston va Eron terma jamoalari o'rtasida kechgan uchrashuvdan so'ng (2:1) Eron terma jamoasi bosh murabbiyi Muhammad Nozim ishtirok etdi. - Eng avvalo ushbu musobaqadagi a'lo tashkilotchilik uchun O'zbekiston futbol federatsiyasiga ulkan minnatdorchilik bildiraman. Shuningdek OFKdan ham behad minnatdormiz. Biz oxirgi ikki musobaqada chempionlikni qo'lga kirita olmayotganimizning sabablaridan biri - terma jamoada avlodlar almashuvi bo'layotgan edi. Bu jarayon qay darajada muhimligini bugungi o'yin ham ko'rsatib berdi.
Biz bu yil federatsiyamizning qo'llashi bilan avlodlar almashinuviga ko'nikib oldik va chempionlikni yana qo'lga kiritdik. Klublar o'rtasidagi jahon chempionatida "Tasizod" klubi chempion bo'lgani va ayollar o'rtasidagi Osiyo chempionatida jamoamzi chempion bo'lgani va nihoyat o'zimiz ham chempion bo'lganimiz bu jarayon qay darajada kechganini ko'rsatib beradi. Biz boshida chempionlikka erishishimizni biroz bo'lsada sezgan edik va kuzatishlarimiz natijasida Osiyoda futzal rivojlanayotgani tufayli etarlicha qarshilik bo'lishini ham bilib turgan edik. Men O'zbekiston terma jamoasini fantastik o'yin bilan tabriklayman.
Shu bilan birga musobaqaga kelgan barcha muxlislar - akalarimiz. ukalarimiz va opa-singillarimizga rahmat. Ularning madadi tufayli o'zimizni o'z uyimizda o'ynayotgandek his qildik. O'zbekistonda muxlislik madaniyati behad yuqori darajada ekaniga o'z ko'zimiz bilan guvoh bo'ldik. Bugungi uchrashuv biz uchun eng og'ir kechgan bahs bo'ldi. Biz bu o'yindan juda qo'rqqan edik. Bu holat ham O'zbekistonda futzal rivojlanayotganini ko'rsatadi. Men umid qilaman va Yaratgandan shuni so'raymanki, har doim muxlislarga yoqadigan o'yin namoyish etish uchun maydonga tushaylik.
Hasanzoda. Osiyo chempionatining eng yaxshi o'yinchisi...
- Mana shunday ajoyib tashkilotchilik uchun OFK va O'zbekistonga rahmat! Bu musobaqani tashkil etishda ishtirok etgan o'zbekistonlik barcha insonlarga minnatdorchilik bildiraman. Ular behad darajada mehmondo'stlik namoyish etdilar. Bu musobaqa ham xuddi 2010 yili bo'lib o'tgani singari mening yodimda faqat iliq lahzalar bilan qoladi. Men uchun eng yaxshi o'yinchiga berilgan sovrindan ko'ra bo'ynimdagi oltin medal qadrliroq. Bu mukofot esa butun jamomizniki. Ularning yordami bilan shu darajada chiqa oldik.
- Nima uchun O'zbekiston Eronga ko'rsatgan qarshilikni boshqa jamoalar namoyish eta olmadi. O'zbekistonning kuchi nimada?
- Ikki jamoa teng saviyada o'yin namoyish etgani O'zbekiston terma jamoasi kuchayib borayotganini bildiradi. Shuningdek O'zbekiston terma jamoasi ajoyib murabbiyga egaligini ham ta'kidlab o'tishim lozim. Ikkinchi o'rinda esa, O'zbekiston terma jamoasining muxlislarini ham e'tirof etish lozim. Bugun muxlislar 40 daqiqa tinimsiz qo'llab quvvatlab turdilar. Butun musobaqa davomida shu holat takrorlandi. Bunday vaziyatda har qanday futzalchi maydonga bor kuchini tashlab chiqishi turgan gap. Biz bunday og'ir holatga Braziliya gran prisida duch kelgan edik. Bunday o'yinlarda ko'p gol urish emas, balki o'yinning borishini nazorat qilish muhimroq.
- Finaldan oldin musobaqadagi eng yaxshi o'yiningizni namoyish etishingizni aytgan edingiz. Bu ishni uddalay oldingizmi?
- Yuz foiz emas. Biz bundan yaxshiroq o'yin namoyish etishimiz ham mumkin edi.
- Terma jamoangiz o'z imkoniyatini qay darajada namoyish eta oldi?
- Biz jahon chempionati yo'lida muhim o'yinlardan birini o'tkazdik.
- Eron terma jamoasi jahon chempionatida to'rtinchi o'rinda qolib ketar edi. Bu natijani yaxshilash vaqti keldimi? Umuman, JCh oldidan jamoangiz tarkibida o'zgarishlar bo'lishi mumkinmi?
- Biz o'z rejalarimizni jahon chempionatiga moslab tuzganmiz. Chunki beshta jamoa orasida mundialga borishimizga ishonchimiz komil edi. Biz JChda ham g'oliblik shohsupasiga ko'tarilishni istaymiz. Biz ikki yil oldin qit'a birinchiligimizda yo'qotgan narsamizni endi yana qaytarib oldik.
— deya xabar beradi uff.uz nashri.