«Navbahor»da to'p surgan Shahboz Erkinov bu yil «Mash'al» sharafini himoya qiladi. Ushbu hujumchi o'tgan yili 13ta gol bilan chempionat to'purarlari poygasida Igor Sergeev (23ta gol) va Bahriddin Vahobov (21)dan so'ng uchinchi o'rinni egallagan edi. Shahboz bu sermahsullikni yangi jamoasida yanada oshirish istagida.
- «Mash'al» rahbariyati menga o'tgan mavsum yakunlanishi hamono taklif bilan chiqqandi, - deya so'z boshladi hujumchi. - Oldimda bir nechta variantlar bor edi. Lekin barchasini o'ylab ko'rib, muborakliklar taklifini qabul qildim. Bu jamoa bir necha yildan beri barqaror o'yin namoyish etib kelyapti. Shu jihat qaror qabul qilishimda muhim rol o'ynadi. Orada Malayziyaga ham borib keldim. Ammo ochig'ini aytsam, o'sha payt jismonan tayyor emasdim.
Shu bois, ortga qaytishga majbur bo'ldim. Aslida, Malayziya klubida qolishim ham mumkin edi. Lekin buning uchun fevralgacha kutishimga to'g'ri kelardi. Bu esa menga ma'qul emasdi. Bilasizmi, Malayziyadan taklif kutilmaganda keldi. 2 yanvar kuni menga qo'ng'iroq qilishdi va 4 yanvarda u erga uchdim. Shartnoma imzolash 90 foizga aniq deyishgani uchun borgandim. Bir hafta ichida ikkita o'yinda maydonga tushdim. Men hali jismonan yuqori darajaga chiqmagandim.
Murabbiylar «Fevral oyi oxirigacha shu erda shug'ullan, agar barchasi yaxshi bo'lsa, shartnoma tuzamiz» deyishdi. Men esa bu taklifga ko'nmadim. O'zbekistonga qaytib, «Mash'al» taklifini qabul qildim. Kelajakda xorijdan yana taklif tushsa, albatta, o'zimni sinab ko'raman.
- «Mash'al»dagi raqobatga tayyormisiz?
- Albatta. Birinchi galda meni juda iliq tarzda kutib olishgani uchun o'z minnatdorchiligimni bildiraman. Futbolchilar bilan avvaldan tanishmiz. Bu borada muammo yo'q. Hamisha raqobat tarafdori bo'lib kelganman. Futbolchi shundagina o'sishga erishadi.
Davomi InterFUTBOL gazetasi blogida.
— deya xabar beradi uff.uz nashri.