Bugun o'zbekistonlik futbol muxlislarini poytaxtimizda ajoyib bellashuv kutib turibdi. Toshkentning “Lokomotiv” klubi mavsumdagi birinchi o'yinida Saudiya Arabistoni etakchilaridan biri, Osiyo chempionlar ligasida ikki marta zafar quchgan “Al-Ittixod” klubiga qarshi maydonga tushadi. Kecha har ikki klub vakillari o'yinoldi mashg'ulotini aynan “Lokomotiv” stadionida o'tkazishdi. Stadion ma'muriyati futbol muxlislari, sport jurnalistlari o'yinni bevosita “Lokomotiv” arenasining o'zidan kuzatib borishlari uchun sharoitlarni muhayyo qilishdi. Bellashuv chiptalari stadion kassasida sotilmoqda. “Lokomotiv” futbolchilari bugun futbol muxlislarimizning qo'llab-quvvatlashlari yordamida mavsumdagi birinchi bellashuvni g'alaba bilan yakunlashga harakat qilishadi. Jamoa etakchilaridan biri Timur Kapadze aytib o'tganidek, ular bugun maydonning har bir qarich eri uchun raqib bilan kurash olib borishadi. Eslatib o'tamiz, bellashuv soat 15:00 da start oladi. Futbol muxlislarimizni “Lokomotiv” stadionidagi qiziqarli to'qnashuvga taklif etib qolamiz.
— deya xabar beradi uff.uz nashri.