«Keksa sinora»ning betakror darvozaboni va sardori Janluiji Buffon qo'lqoplarini mixga ilish oldidan yana nimalarnidir yutmoqchi. Harqalay, u 40 yoshigacha o'ynashni ko'zlayotganini hech qachon yashirgan emas. Ikkinchi tomondan, «Yuventus» posboni Italiya futbolida nihoyat, terma jamoa darvozasida uning o'rnini egallashga tayyor yigit bosh ko'targanidan g'oyat xursand.
- Mana, 38 yoshga to'ldingiz. Umringizni 20 yilini esa futbol o'ynash bilan o'tkazdingiz...
- Ha, darhaqiqat, umr bo'yi futbol ichidaman. Bu ajoyib.
- Faoliyatingiz beqiyos voqealar va sururbaxsh lahzalarga boy. Xotirangizda muhrlanib qolgan eng yaxshi 2ta voqeani tilga olsangiz...
- Birinchisi - «A» seriyasidagi debyutim. Ilk marta maydonga tushgan vaqtimdagi holatimni hozir tasvirlab berolmayman. Aytish mumkinki, bu bilan bolalik orzum amalga oshgandi. Ikkinchisi - JCh-2006dagi g'alaba. Bunisi ham ta'riflashga muhtoj emas. Aniq maqsadga intilish xususiyati hozirgacha har safar yuqori saviyada harakatlanishimga yordam beryapti.
- Oxirgi vaqtlarda ancha oriqlagandeksiz. Nima, mashg'ulotlarda o'zgarish bormi?
- Yo'q. Shunchaki, ovqatlanish tartibiga qat'iy rioya qilyapman. Deylik, hozir bu masalaga 7-8 yil oldingiga nisbatan e'tiborim ancha baland. Qaysidir taomlardan voz kechgan emasman. Oddiy aytganda, vaqtida va yaxshi ovqatlanishni o'rgandim.
- Futbol bilan xayrlashuvingizni qanday tasavvur qilasiz?
- Har qanday vaziyatda ham, boshimni tik tutgan holda ketishni istayman. Barchasi oddiy kechishi tarafdoriman, ya'ni qandaydir dabdaba yoxud g'ayritabiiylikka xushim yo'q. Umuman, 40 yoshimgacha o'ynashda davom etsam yaxshi bo'lardi. Deylik, jahon chempionatida yana bir marta ishtirok etishdan umidvorman.
- O'zingiz o'ynagan davrni olsak, terma jamoaning qaysi tarkibi eng kuchlisi?
- Texnik nuqtai nazardan qarasak, 2002 yilgi jamoa aql bovar qilmas darajada shakllangandi. 2006 yili esa temir ruh va sabot bilan o'ynaganmiz. Quvonarlisi, oxirgi bir necha yillardan buyon bu xususiyat bizga yana qaytyapti.
- Davom etamiz - «Yuventus»ning qaysi tarkibini eng kuchlisi sifatida e'tirof etasiz?
- Shaxsiy fikrimcha, 2002-2003 yillar mavsumida ChL finaliga chiqqan va faqat penaltilar seriyasida yutqazgan Marchello Lippi jamoasi eng zo'ri bo'lsa kerak. Agarda tarkibda jamlangan asosiy va zaxira futbolchilarini nazarda tutsak, unda Fabio Kapello tuzgan jamoaga teng keladigani yo'q. Lekin oxirgi yillarda Antonio Konte va Massimiliano Allegri boshqaruvida o'ynagan jamoalarning xarakteriyu, barqarorligini ham maqtashim joiz.
Davomi InterFUTBOL gazetasi blogida.
— deya xabar beradi uff.uz nashri.