“Al Ahli” – “Nasaf”  jamoalari uchrashuvidan oldingi o'tkazilgan matbuot anjumanida dastlab “Nasaf” bosh murabbiyi Ro'ziqul BERDIEV va jamoa sardori Artug GEVORKYaN ishtirok etishdi.
- Ertangi o'yin biz uchun oson kechmaydi, -deya so'z boshladi Ro'ziqul Sa'dullaevich. – Chunki raqibimiz kuchli va tajribali jamoa. Tarkibi ham mahoratli futbolchilardan iborat. “Al Ahli” bilan o'tgan yili ham kuch sinashganmiz va jamoaning imkoniyatlari bizga yaxshi ma'lum.
Qolaversa, jiddaliklar tajribali murabbiyga ham ega. O'tgan yili “Al Ahli”ni kamida yarim finalga borishini kutgandim. Afsuski, ular 1/8 finaldayoq musobaqa bilan xayrlashishdi. O'tgan yili Jiddada mag'lub bo'ldik, Qarshida durang qayd etdik. Qarshidagi bahsda yaxshi o'yin ko'rsatsakda, g'alabaga erisha olmagandik.
- Guruh haqida fikringiz? Qaysi jamoalarni keyingi bosqichga chiqish imkoniyati yuqori, deb baholaysiz?
- Fikrimcha, bizning guruh OChLdagi eng kuchli guruhlardan biri. Har bir klub o'z mamlakatining etakchi jamoasi hisoblanadi. Albatta biz ham ijobiy natija uchun harakat qilamiz. Buning uchun aqlli va tartibli harakat qilishimiz lozim. Ushanda yaxshi natijaga erishish mumkin. Keyingi bosqichga chiqishda hamma jamoaning imkoniyati teng. Buni o'tkaziladigan o'yinlar ko'rsatib beradi.
Artur Gevorkyan:
- Ertangi o'yinga munosib hozirlik ko'rdik. Raqibimiz o'ta jiddiy. Dastlabki o'yindagi g'alaba har ikki tomon uchun ham muhim. Shu bois safardan faqat ijobiy natija bilan qaytish ilinjida to'p tepamiz.
— deya xabar beradi uff.uz nashri.