Kechadan Ociyo chempionlari ligasining guruh bosqichichi bahslari boshlandi. Ayrim jamoalar allaqachon 1-tur uchrashuvlarini ham o'tkazib bo'lishdi. Qit'amizning ushbu nufuzli musobaqasida O'zbekistondan 4 ta jamoa ishtirok etmoqda. Shu bois yurtimiz futbol ishqibozlarining diqqat-e'tibori mazkur musobaqaga qaratilgan desak yanglishmaymiz.
“Lokomotiv” Saudiya Arabistonining grand jamoalaridan biri — “Al-Ittixod” bilan Toshkentda, “Bunyodkor” esa “An-Nassr” bilan safarda durang o'ynadi. Ertaga yana ikki klubimiz “Paxtakor” va “Nasaf” Saudiya Arabistonining “Al-Hilol” hamda “Al-Ahli” jamoalaridan ochko olishga harakat qilishadi. Ushbu bahslarda hamyurtlarimizga omad yor bo'lishini tilab qolamiz.
Bundan tashqari, bugun oqshomda, ya'ni 23 fevraldan 24 fevralga futbol ishqibozlarini yana ikki ajoyib futbol spektakli kutib turibdi. Evropa chempionlari ligasining nimchorak final bahslari davom ettiriladi. Kecha muxlislar “Yuventus” —“Bavariya” (2:2), “Arsenal”—“Barselona” (0:2) o'rtasidagi ajoyib o'yinlarning shohidi bo'lishdi. Bugun Kievda “Dinamo” Manchesterning “Manchester Siti” jamoasiga qarshi maydonga chiqsa, “PSV Eyndxoven” o'z maydonida Madridning “Atletiko”sini qabul qiladi. Xullas, to 17 martga qadar shiddatli kurashlarga, hayajonli daqiqalarga boy ajoyib futbol uchrashuvlari og'ushidamiz.
Ammo meni shu tobda na OChL, na EChL bahslari qiziqtirayotgani yo'q. Mening tashvishim milliy terma jamoamizning jahon chempionati saralashidagi ishtiroki bilan bog'liq. Sababi roppa-rosa 1 oydan so'ng, ya'ni 24 mart kuni O'zbekiston milliy MTJ Toshkentda Filippin, 29 mart kuni esa Manamada Bahrayn milliy terma jamoalari bilan o'ynaydi.
Garchi “JCh-2018” saralashining so'nggi ketma-ket 5 o'yinida g'alaba qozongan, Samvel Babayan terma jamoa boshqaruviga kelgandan so'ng biror marta mag'lubiyatga uchramagan bo'lsak-da, oldinda turgan uchrashuvlar biz uchun oson kechmasligini, raqiblarimiz ham anoyi emasligini ko'pchiligimiz his qilib turibmiz.
Xavotirli jihati shundaki, terma jamoamiz sal qolsa ushbu bosqichdayoq mundial bilan xayrlashishi mumkin edi. Bungacha hal qiluvchi bosqichga muammosiz etib borishga odatlanganimiz “oq bo'rilar”ga guruh bosqichining dastlabki o'yinlarida ancha qiynaldi. To'g'ri, bosh jamoamiz keyinchalik o'yinini topib olgan bo'lsa-da, JCh yo'lidagi asosiy raqiblarga qarshi kechadigan shiddatli kurash hali oldinda (avval o'sha bosqichga etib borish kerak).
Saralash turnirining 3-bosqichiga 8 ta guruhda 1-o'rinni egallaganlar, shuningdek, eng yaxshi ko'rsatkichga ega 4 ta 2-o'rin sohiblari chiqishida. O'zbekiston ishtirok etayotgan “H” guruhida 2-o'rin uchun kurash allaqachon yo'qqa chiqqan. Sababi ayni paytda 3-o'rinda borayotgan Filippinda 7, Bahraynda esa 6 ochko bor. Terma jamoamiz oldindangi har ikki o'yinda yutqazib, ular esa navbatdagi bahslarda 6 ochko jamg'argan taqdirda ham bizga eta olmaydi. Demak, 2-o'rindan tushib ketmasligimiz aniq. Ehtimollar nazariyasidan kelib chiqib, boshqa natijalarni ham ko'rib chiqsak.
Davomi Tafsilot.Uz blogida.
— deya xabar beradi uff.uz nashri.