Afsuski, o'zbek futboli muxlislari orasida milliy chempionatimizga qiziqish u qadar yuqori emas. Sababini o'zingiz yaxshi bilasiz. Ammo futbolga umumiy qiziqishni shu tendentsiyaga asosan o'lchamasdik aslo.
Chunki oliy liga ishqibozi qay darajada kam bo'lmasin, Angliya, Ispaniya, Italiya va Evropadagi boshqa kuchli chempionatlar ixlosmandlarini istagancha topish mumkin. Bu holat yurtimizda muxlislik qay darajada rivojlanganini ko'rsatib bersa kerak. Boz ustiga, bizda muxlislar futbolimizga rosmana e'tibor qaratadigan vaqt ham bor - O'zbekiston milliy jamoasi o'yinlari. Termamiz maydonga tushadigan kunlar butun boshli ko'chalar yopilganini ko'p ko'rganmiz.
Albatta, oliy liganing bu darajaga chiqishi juda qiyin. Shu sababli ham, bugungi suhbatimizni aynan O'zbekiston chempionatiga qaratishni ma'qul ko'rdik. Zero, muxlislarga aytadigan gaplarimiz bor. Xullas, barchani yangi mavsumda oliy liga o'yinlarini kuzatib borishga chaqirmoqchimiz. Bunga sabab bo'la oladigan 5ta asosiy omil bilan esa quyida tanishib olishingiz mumkin.
1. SERVERNING QAYTIShI
Osiyoning ikki karra eng yaxshi futbolchisi joriy yildan e'tiboran yana o'z uyida to'p suradi. Bu yaxshi yangilik, albatta. Server Jeparov - oliy liga darajasidan ancha yuqori bo'lgan o'yin-chi. Axir hammaga ham J.Koreya va Saudiya Arabistonida 6ta noli bor raqamda maosh to'layvermaydilar. Shu sababli ham, Serverning «Lokomo- tiv»ga o'tgani haqidagi xabar nafaqat «temiryo'lchilar»ning kamsonli muxlislari, balki o'zbek futboliga qiziqadigan har qanday insonni xursand qildi.
Server Jeparov uzoq yillar O'zbekiston milliy jamoasida sardorlik qildi. Qo'yib bersangiz, hozir ham bu ishni ajoyib tarzda uddalaydi. Yarim himoyachi darhaqiqat, professional futbolning yorqin timsoli bo'lib qolmoqda. U yurtimizdagi har bir futbolchiga o'rnak o'laroq xizmat qilishi mumkin. Mana, 34 yoshida ham ajoyib sport formasi va «Lokomotiv»ga Osiyo Chempionlar Ligasi, oliy liga va milliy kubok bahslarida yordam berishi turgan gap. Yana shunga ham ishonamizki, Server aynan «temiryo'lchilar» tarkibidagi ishonchli harakatlari evaziga xorij klublariga qaytishi hech gap emas. Boz ustiga, Server Jeparovning aynan «Lokomotiv»da o'ynashining yana bir ijobiy jihati bor. O'tgan mavsumdan e'tiboran bu klub tarkibida uning uzoq yillik hamkori va yaqin do'sti - Temur Kapadze to'p surmoqda. Bu juftlik o'z ortidan butun jamoani ergashtirganini ko'p ko'rganmiz. Shunday ekan, «Loko»ning oliy liga doirasida «Paxtakor», «Bunyodkor» va «Nasaf»ga qarshi kechadigan printsipial bahslari yanada shiddatli ko'rinish olishi turgan gap. Bu o'yinlarni tomosha qilish albatta, shart...
2. «BUNYoDKOR»NING YoShLARI
Hozirgi «Bunyodkor» bir jihati bilan 4-5 yil oldingi «Paxtakor»ni eslatib yuboradi. Agar ilgari «Paxtakor» rahbariyati yosh futbolchilarga e'tibor qaratayotganini ko'p bora ta'kidlagan bo'lsa, endi bunday nutq so'zlash navbati «Bunyodkor» vakillariga kelgan. Tan olish lozim, «qaldirg'ochlar» bu ishni ancha yaxshi uddalamoqdalar. O'tgan yil yakunlariga ko'ra, klubning bir yo'la 3 nafar futbolchisi Osiyo-ning eng yaxshi yosh o'yinchisi nomiga da'vo qilgani ham bu fikrimizga tasdiqdir. Dostonbek Hamdamov, Eldor Shomurodov va Zabihillo O'rinboev darhaqiqat, o'z o'yinlari bilan bunday e'tirofga munosib ekanliklarini ko'rsatdilar. Boz ustiga, «qaldirg'ochlar» aynan shu yoshlarning faolliklari evaziga Osiyo Chempionlar Ligasida «Al-Shabab»dek raqibni mag'lub etish uddasidan chiqdilar.
Shunday ekan, «qaldirg'ochlar»ning yangi mavsumdagi o'yinlarini kuzatish ancha maroqli. Hozir vaziyat shundayki, «Bunyodkor»dagi yoshlarning har biri asosiy tarkibga kirishi ham, kirmay qolishi ham mumkin. Klub mavsum oldidan o'tkazgan taqdimot marosimida asosiy tarkibga kirish uchun keskin raqobat kechishini ta'kidladi. Darhaqiqat, shunday. Masalan, Otabek Shukurov nima sababdan Aleksandr Alimpievichdan ustun ekanini isbotlashi kerak, Zabihillo O'rinboev hujumda xuddi shu ishni Bahodir Nasimovga qarshi kechadigan raqobatda uddalashi lozim. Shuningdek, Dostonbek Hamdamovning joyiga ko'z olaytiradiganlar ham topilishi muqarrar. Birgina Satoning o'zi qancha futbolchiga arziydi. Bu esa «Bunyodkor»ning o'tgan yilgidek 4-o'rin emas, balki yaxshiroq natija uchun kurashishiga umid qilish imkonini beradi. O'z navbatida, printsipial raqiblarga qarshi kechadigan o'yinlar ham shiddatliroq tus olishi tayin. Bunday o'yinlarni tomosha qilish esa muxlislar uchun ham qiziqarli, albatta...
3. «PAXTAKOR»DAGI MUAMMOLAR
«Paxtakor» so'nggi 2 yilda O'zbekiston chempionatining so'zsiz, etakchisi bo'lib keldi. «Sherlar» boshqa-ruvida uzoq davom etgan «yoshlar» siyosati nihoyat, muvaffaqiyatli yakunlandi va klub qatorasiga ikki marta chempionlikni nishonladi. Ammo toshkentliklarning navbatlari mavsum ham bu ishni uddalashlari ancha shubha ostida turibdi. Bunga bir qator sabablar bor. Avvalo jamoa etakchisi Kaxi Maxaradze ketganini aytish joiz. Albatta, birgina futbolchining ketishi jamoaga nisbatan ishonchni pasaytirib yubormasligi kerak. Ammo Maxaradzening «Paxtakor» o'yinida tutgan o'rnini inobatga olsak, bunga aslo hayron qolish shart emas. Boz ustiga, bu futbolchi «Paxtakor»ning ashaddiy raqibi - «Lokomotiv» tarkibiga o'tib ketgani ham vaziyatni ancha chigallashtiradi.
«Paxtakor»da shuningdek, boshqa muammolar ham bordek. Masalan, moliya masalasida. Demak, boshlanajak mavsum «Paxtakor» avvalgidek «gegemon»lik qilolmasligi mumkin. Shu holat ham oliy ligaga qiziqishni ancha oshirishi kutilmoqda. Nima ham derdik, mavsum startga chiqsin, hammasini bilib olamiz. Faqat, buning uchun stadionlarga tushish kerak-da. A, labbay? Nima dedingiz?
Davomi InterFUTBOL gazetasi blogida.
— deya xabar beradi uff.uz nashri.