Ortda qolgan hafta futbol olami uchun bir qator yangiliklar, qiziqarli voqea va hodisalarni tuhfa etdi. FIFAga yangi prezident tayinlandi, Messi uzoq kutgan golini Petr Chex darvozasiga kiritdi. Bir necha kun avval esa Lui van Gal ajoyib “sho'ng'ishi” bilan barchani hayratda soldi. Xullas, haftaning eng qiziqarli voqealariga karikaturalar orqali ta'rif berib o'tamz.
Messining uzoq kutilgan goli
“Barselona” jamoasi etakchisi Lionel Messi nihoyat Petr Chex darvozasi tomon yo'l topdi. Argentinalik futbolchi EChL nimchorak finali doirasida "Arsenal"ga qarshi kechgan o'yinda, naqd ettinchi o'rinishda chexiyalik posbonning darvozasini aniq nishonga oldi. Ustiga-ustak u ikki bor Chexning darvozasiga gol kiritdi.
Reshford xaloskor!
"Manchester Yunayted" jamoasi Evropa ligasi 1/16 final ilk o'yinida "Midtyullann"ga 1:2 hisobida imkoniyatni boy bergandi. "Old Trafford"da o'tkazilgan javob o'yinida esa hech kim tanimagan 18 yoshli Markus Reshford "MYu"ni g'alaba sari boshladi. "Qizil iblislar" yakunda 5:1 hisobida zafar quchdi.
 
FIFA saylovi
O'tgan hafta FIFA prezidentligi uchun uzoq kutilgan saylov ham bo'lib o'tdi. Blatterning yillar davomida egallab turgan joyiga Janni Infantino, Shayx Salmon bin Ibrohim al-Xalifa, Ali bin al-Husayn, Jerom Shampan va Toyko Sevale da'vogarlik qilgandi.
 
Ikki turdan iborat bo'lgan saylov natijasiga ko'ra, ko'pchilik kutganidek UEFA bosh kotibi lavozimida ishlab kelgan Janni Infantino g'olib bo'ldi. FIFA prezidenti vazifasini vaqtincha bajaruvchi Issa Hayatu o'z kursisini Infantinoga topshirdi. Mutasaddi bir qator va'dalar berdi va ularning ro'yobi qanchalik rost bo'lishini yaqin vaqt ichida bo'lib olamiz.
"Atletiko" quvishda, "Barselona" qochishda davom etmoqda
Ispaniya chempionatida bosh sovringa qaysi jamoa ega bo'lishi asta-sekin oydishlashib bormoqda. "Atletiko" safarda "Real"ni yutib, "Barselona"ga yaqinlashgan bo'lsa, katalonyaliklar ertasiga "Sevilya" ustidan irodali g'alabaga erishdi va shu orqali "matraschilar"dan qochishda davom etmoqda. Hozirda Luis Enrike jamoasi 66 ochko bilan peshqadam. Ortda borayotgan Madrid jamoalari "Atletiko" hamda "Real" mos ravishda 58 va 54 ochkoga ega.
Reshford ikki karra xaloskor!
"Midtyullan"ga qarshi o'yinda jamoasi g'alabasiga ulkan hissa qo'shgan Markus Reshford APL 27-tur markaziy o'yinida "Arsenal"ni ham ikkita gol bilan "siyladi". Natijada yosh "vunderkind" dastlabki ikki o'yinida to'rtta gol kiritishga va asosiysi Lui van Gal jamoasiga har ikki muhim o'yinda g'alaba keltirishga muvaffaq bo'ldi.
Ronaldu: Jamoadoshlarim menga o'xshab...
Ha, Ronaldu bilib-bilmay (balki atayindir) matbuotda jamoadoshlari saviyasi borasida keraksiz gaplarni aytib o'tdi. Emishki, "Real"da hamma unga o'xshab o'ynasa, jamoa birinchi o'rinda bo'lardi.
 
Ikki kun o'tar-o'tmas portugaliyalik jamoadoshlaridan uzr so'radi. Ronalduning gaplariga qaraganda OAV uning so'zlarini noto'g'ri talqin qilgan ekan. Tan olish kerak, Ronaldu avvalgidek o'yinlarga ishtiyoqi yo'q va jamoa muvaffaqiyati faqat unga bog'liq emas. Shunday ekan, Florentino Peres undan tez orada "qutulishini" hamkasblariga aytib o'tdi.
Lui van Galning shedevr "sho'ng'ishi"
"Arsenal"ga qarshi o'yinda "MYu" ustozi o'yinga va hissiyotlarga shu darajada berilib ketdi-ki, gollandiyalik to'rtinchi hakam oldida yiqilib berishdan tab tortmadi. U raqib futbolchisi simulyatsiya ishlatganini ingliz tilida tushuntirib bera olmagach, o'z "aktyorlik" mahoratini ishga soldi. Bu voqea ko'pchilikka kulgu bo'ldi. O'yindan keyin esa van Gal qilmishidan afsusda ekanini aytib, uzr so'rab qo'ydi.
Yuqoridagi karikaturalar Sizga manzur deb o'ylaymiz. Kelasi sahifalarda uchrashguncha!
P.S.
Bugungi sahifada Omar Momani va beINSports karikaturalaridan foydalanldi.
— deya xabar beradi uff.uz nashri.