“Bunyodkor” – “An-Nassr” (0:1) uchrashuvidan so'ng o'tkazilgan matbuot anjumanining birinchi qismida saudiyaliklar ustozi Raul Kaneda va o'yinning eng yaxshi futbolchisi deb topilgan Modibo Mayga ishtirok etdi. "Bugun bizga omad kulib boqdi. Uchrashuvning birinchi bo'limiga tanlagan rejamiz ish berib, tanaffusga g'olib sifatida chiqib ketdik. Ikkinchi bo'limda esa asosiy e'tiborimizni himoyaga qaratdik. “Bunyodkor” tanaffusdan keyin jon jahdi bilan o'ynay boshladi. Omad tufayligina darvozamiz daxlsiz qoldi. “Bunyodkor” to'p bilan muomala qilishda juda kuchli raqib. O'tgan o'yin bilan bugungisini solishtiradigan bo'lsak, biz o'zgardik. Raqib esa o'sha-o'sha kuchli. Avvalgi bahsda posbonimiz qo'pol xatolarga yo'l qo'ygan edi. Shundan so'ng Rene Igita u bilan yaxshi ish olib bordi. Buning samarasini bahs davomida ko'rdik", - deydi Raul Kaneda. "Uch ochko osonlikcha qo'lga kiritilgan yo'q. “Bunyodkor” juda kuchli jamoa. Ularni omad tufayligini yutdik, deb o'ylayman. 5-6 oy ilgari Angliya premer-Ligasida o'ynardim. Hozir Saudiya Arabistonida to'p tepyapman. Rostini aytsam, ikkala chempionat o'rtasida juda katta farq bor. Biroq Osiyoda ham futbol o'sib borayotganini aytib o'tish darkor. Mana masalan bugun juda yaxshi saviyadagi o'yin guvohi bo'ldik", - deydi Modibo Mayga.
— deya xabar beradi uff.uz nashri.