O'tgan haftada Evropa ligasi va Osiyo chempionlari ligasida qiziq voqea ro'y berdi. Angliyaning «Manchester Yunayted» jamoasi 18 yoshli hujumchisi Markus Rashford Daniya milliy birinchiligining amaldagi chempioni «Midtyullann» klubiga qarshi kechgan o'yinida mankunianliklar safidagi debyut o'yinidayoq ikki to'p kiritib, g'alabaga munosib hissa qo'shdi. Ushbu g'alaba «qizil iblislar»ni musobaqaning nimjorak finaliga olib chiqdi. Rashford esa «MYu» safida evrokuboklarda gol urgan eng yosh futbolchi sifatida tarix sahifasidan joy oldi.
OChL guruh bosqichining 1-turida Bunyodkor safarda «Al Nasr» bilan o'ynadi. Mazkur bahsda «qaldirg'ochlar» yarim himoyachisi Doston Hamdamov bir-biridan chiroyli 2 ta golning muallifiga aylandi. Biroq «MYu»dan farqli o'laroq «Bunyodkor» g'alabani ushlab qola olmadi. Uchrashuv 3:3 hisobidagi durang bilan yakunlandi.
Albatta, turnirlarning saviyasi jihatidan Evropa ligasi va Premer liga OChL hamda O'zbekiston milliy birinchiligidan har tomonlama ustun hisoblanadi. Bu haqda hech qanday gap-so'z bo'lishi mumkin emas. Tafsilot.uz ana shu voqea bahonasida har ikki futbolchini solishtirishga qaror qildi.
Karera
Markus Rashford 1997 yilning 31 oktyarida Manchesterda tug'ilgan. «MYu»ga esa 2014 yilning 1 iyulida Angliyadagi mashhur yoshlar akademiyasi «Fletcher Moss Rangers»dan o'tgan. O'z vaqtida Ues Braun, Denni Uelbek va Ravel Morrisonlar ham xuddi shunday yo'lni bosib o'tishgan.
Ushbu mavsumda Rashford «MYu» yoshlari (U19) tarkibida sardorlik bog'ichini qabul qilib oldi va UEFAning yoshlar ligasida 5 to'p kiritishga muvaffaq bo'ldi. «MYu»ning 21 yoshgacha bo'lgan futbolchilari safidagi birinchi golini 2015 yilning dekabrida «Lester»dagi tengdoshlariga qarshi o'yinda, o'ziga ajratilgan 16 daqiqa ichida urgan edi. Markus, shuningdek, «qizil iblislar»ning asosiy tarkibi bilan bir necha bor mashg'ulotlarda qatnashib, APLda «Uotford» va «Lester»ga qarshi kechgan o'yinlarni zaxira o'rindig'ida kuzatdi.
Doston Hamdamov — 1996 yilda Bekobodda tavallud topgan. Futboldagi ilk qadamlarini Yangier futbol maktab-internatida qo'ygan. 2009 yildan buyon «Bunyodkor» futbolchisi. «Qaldirg'ochlar»ning turli yoshdagi guruhlarda, jumladan, katta yoshdagi futbolchilardan iborat jamoalarda ham to'p surgan. Afsuski, uning bu davrdagi uchrashuvlari, gollari haqida ma'lumotlarni topa olmadik. Har holda uning Rashforddan ko'proq gol urganini taxmin qilish qiyin emas. Sababi o'zingizga ma'lum — chempionatning darajasi. Biroq bu o'zbek o'g'lonining iste'dodiga soya sola olmaydi.
2014 yilgi mavsumda Oliy liga va O'zbekiston kubogi doirasidagi 11 o'yinda maydonga tushib, 4 ta gol urgan. O'tgan yili esa Oliy ligada 24 ta o'yinda 8 ta gol urib, 5 ta golga mualliflik qilgan bo'lsa, O'zbekiston kubogida 6 o'yinda 4 ta gol (+ 1 ta golli uzatma) qayd etgan. «Pley-off»ni qo'shib hisoblaganda, OChLda 6 o'yin o'tkazgan. Dostonbek shu vaqtgacha «Bunyodkor» safida 47 o'yinda maydonga tushib, 3207 daqiqa o'ynagan. Shundan 33 ta o'yinni asosiy tarkibda boshlagan bo'lsa, 147 tasida zaxiradan maydonga tushgan.
Ilgari katta mablag'lar sarflab yulduzlarni sotib oladigan «Bunyodkor» jamoasi kadrlar siyosatidagi o'zgarishlardan so'ng akademiyaga ham e'tibor qaratishni boshlagach, yoshlarga ishonch bildirila boshlandi. Jumladan, ana shu imkoniyat tufayli Doston 2014 yili poytaxt jamoasi safida O'zbekiston oliy ligasida, 2015 yili OChLda debyut qildi. To'g'ri, Doston uchun debyut mavsum ko'ngildagidek o'tgani yo'q. Avlodlar alomashinuvini boshdan kechirayotgan «Bunyodkor» OChLda guruhdan chiqa olishmagan bo'lsa, milliy birinchilikda esa sovrinli o'rinlardan quruq qoldi.
2015 yili Yangi Zelandiyada bo'lib o'tgan jahon chempionatidan kuchga to'lib qaytgan Hamdamov milliy birinchilikda «Qaldirg'ochlar»ga ko'proq foyda keltirdi. Bu mavsumdagi o'yinlari uning yanada o'sganini ko'rsatmoqda. Sardor Rashidovning jamoani tark etishi ham uning foydasiga ishlashi mumkin. Muxlislar allaqachon uni yangi Rashidov deb atashayotir.
O'yin uslubi
Markus — tezkor, charchash nimaligini bilmaydigan hujumchi. Juda kuchli zarbasi bor. Keskin o'ynaydi, jarima maydonchasi ichida ustunlikni qo'lga olishga, yuzaga keladigan kichik imkoniyatdan ham foydalanishga qodir futbolchi. U golli vaziyatni juda yaxshi his qiladi. Bo'yi unchalik baland bo'lmasa-da (173 santimetr), standart vaziyatlarda raqiblarga katta xavf tug'dira oladi.
Doston — hujumchi. Bo'yi: 178 sm. Vazni: 76 kg. To'pni kutib o'tirmaydi, o'zi ham jamodoshlariga o'yinni tashkil etishga ko'maklashadi, kerakli vaziyatda to'pni qizg'anmay sheriklariga oshirishinini faqat va faqat olqishlash kerak. Maydonni juda yaxshi ko'ra oladi. Jismoniy tayyorgarligi ham yaxshi. Zarbasi haqida-ku gap bo'lishi mumkin emas. Buni, ayniqsa, uning zarbasini sinovdan o'tkazgan darvozabonlar juda yaxshi bilishadi.
Davomi Tafsilot.Uz blogida.
— deya xabar beradi uff.uz nashri.