Bugundan O'zbekiston XXV milliy chempionati start oladi. Birinchi turda respublikamizning 8 ta stadionida yangi mavsum bayroqlari ko'tariladi. Dastlabki tur o'yinlari 5—7-mart kunlari bo'lib o'tishi rejalashtirilgan.
1 – TUR
05.03.2016
Qo'qon-1912 – Obod
Qizilqum – Mash'al
Buxoro – Olmaliq
Metallurg – So'g'diyona
Bunyodkor – Neftchi
06.03.2016
Navbahor – Lokomotiv
Nasaf – Sho'rtan
07.03.2016
Paxtakor – Andijon
Xo'sh, ushbu mavsumdan nimalarni kutayapsiz? Milliy birinchiligimiz saviyasida o'sish bo'larmikan? Jamoalar futbol ishqibozlari kutgan shiddat, intriga va chiroyli o'yinni ko'rsata olishadimi? Umuman, Oliy liganing yangi mavsumi boshlanishini kutdingizmi o'zi?
Savollar ko'p. Ularga beriladigan javoblar ham xilma-xil bo'lishi tabiiy. Tafsilot.uz oddiy muxlislarning yangi mavsumdan nimalar kutishayotgani bilan qiziqib ko'rdi. Shuningdek, kun savoli bo'yicha muxlislarning fikrini bilish maqsadida maxsus so'rov tashkil etdi.
Ahmad Ziyodov, o'qituvchi, 55 yoshda:
— Shubhasiz, sog'indim. Evropa davlatlarining milliy birinchiliklarini kuzatish, albatta, zavqli. Ammo o'zimiznikiga nima etsin.  Paxtakor ning ashaddiy muxlisiman. Ilgari nima bo'lishidan qat'i nazar barcha o'yinlarni stadionga borib tomosha qilardim. Oxirgi yillarda salomatligim bunga yo'l bermayapti. Yaxshiyam televizor bor ekan, u jonimga ora kirayapti.
Umrqul Sobirqulov, 68 yoshda, pensioner:
— Shaxsan men Oliy ligani sog'inganim yo'q. To'g'risini aytadigan bo'lsam, milliy chempionatimizda hech qanday mo''jiza sodir bo'lishini kutmayapman. Yana o'sha-o'sha jamolar ochkolarni yig'averishadi, kuboklar, medallar o'sha o'zimiz o'rganib qolgan klublar o'rtasida taqsimlanaveradi. O'tgan yilgi mavsumdagi kelishilgan o'yinlar haqidagi shov-shuvlardan keyin kim ham Oliy liga bahslarini ko'rardi?! Ana shu kabi muammolar bartaraf etilsa, o'yinlarni nafaqat televizordan, balki oldingidek stadionga borib tomosha qilar edim.
Tafsilot.Uz blogidan olindi.
— deya xabar beradi uff.uz nashri.