Prezidentimiz Islom Karimov O'zbekiston Bolalar sportini rivojlantirish jamg'armasi Homiylik kengashining navbatdagi yig'ilishida qizlarni ommaviy sportga jalb etishning muhim jihatlariga to'xtalib, qizlarimiz timsolida biz avvalambor bo'lg'usi onalarni, xalqimiz, millatimizning umidi va tayanchi hisoblangan kelajak avlodni dunyoga keltirib, voyaga etkazadigan naslimiz davomchilarini ko'ramiz. Qiz bola sog'lom va baxtli bo'lsa, u quradigan oila ham, uning mevasi bo'lmish bola ham sog'lom va baxtli bo'ladi. Oila sog'lom va baxtli bo'lsa, butun jamiyat baxtli va farovon bo'ladi, deb ta'kidladi.
Mamlakatimizda bolalar sportini rivojlantirish, ayniqsa, bolalar va xotin-qizlar o'rtasida jismoniy tarbiya va sportni keng targ'ib qilish, oilalarda sog'lom turmush tarzini qaror toptirishga alohida e'tibor qaratilmoqda.
Namangan viloyatida bugungi kunda qizlarning 47,5 foizi sport bilan muntazam shug'ullanmoqda. O'zbekiston Bolalar sportini rivojlantirish jamg'armasi tashkil etilganidan buyon viloyatda 179 zamonaviy sport inshooti bunyod etildi. E'tiborlisi, ularning aksariyati qishloqlarda faoliyat yurtimoqda.
Viloyatda suv sporti ham rivojlanib, yoshlar o'rtasida keng ommalashmoqda. Suv sporti bo'yicha viloyat terma jamoasi xalqaro miqyosda o'tkazilayotgan musobaqalarda muntazam yuksak natijalarga erishayotgani buning yaqqol tasdig'idir.
Malayziya poytaxti Kuala-Lumpur shahrida 2012 yilda o'tkazilgan vaterpol bo'yicha xalqaro turnirda viloyat o'smirlar va qizlar terma jamoasi birinchi o'rinni egallab, O'zbekiston yoshlari hech kimdan kam emasligini yana bir bor isbotladi. O'sha yili Germaniyada eshkak eshish bo'yicha tashkil etilgan xalqaro turnirda 2 nafar sportchi ikkinchi, 1 nafari uchinchi o'rinni egalladi. Malayziyada yoshlar va o'smirlar o'rtasida o'tkazilgan jahon chempionatida o'smirlar ham, qizlar ham g'oliblik shohsupasiga ko'tarilib, maxsus kubok va oltin medalga sazovor bo'ldi.
Viloyatda suv sportining rivojlanishi va bu yo'nalishda erishilayotgan muvaffaqiyatlarda suv sporti bo'yicha mamlakatimiz terma jamoasi bazasi hisoblanadigan 23-olimpiya zaxiralari ixtisoslashtirilgan bolalar va o'smirlar sport maktabining alohida o'rni bor.
Hozirgi kunda maktabda suv sportining 5 turi – vaterpol, suvga sakrash, sinxron suzish, suzish, slalomda eshkak eshish bo'yicha 31 guruh faoliyat ko'rsatmoqda. Ularga jalb etilgan 300 dan ortiq sportchining 100 nafardan ziyodi qizlardir. Vaterpol bo'yicha viloyat terma jamoasi tarkibi to'liq ushbu muassasa tarbiyalanuvchilaridan tashkil topgan. O'tgan yili 55 tarbiyalanuvchi suv sporti turlari bo'yicha mamlakat terma jamoalari tarkibida turli musobaqalarda ishtirok etdi. Ularning 25 nafari qizlar ekani alohida e'tirofga sazovor.
Maktab tarbiyalanuvchilari 2015 yilda ham katta muvaffaqiyatlarni qo'lga kiritdi. Jumladan, Toshkent va Namanganda vaterpol, suvga sakrash, slalomda eshkak eshish bo'yicha o'tkazilgan O'zbekiston chempionatlarida maktab tarbiyalanuvchilari 24 oltin, 91 kumush va 45 bronza medallarga sazovor bo'ldi.
May oyida vaterpol bo'yicha Malayziya ochiq chempionatida Komila Ergasheva, Guzeliya Xametova, Galiya Baykerova, Sevinch Zohidjonova, Sevara Ikromova, Mohinur Ahmadjonova, Huriniso Qahhorova, Rufina Nigmatullina, Fadina Xamitova, Sabina Valitova, Darya Titova, Zarina Jamoliddinova, Tatyana Gadjievadan iborat qizlar terma jamoasi birinchi o'rinni egalladi.
– Prezidentimiz namanganlik vaterpolchi qizlarning sportdagi yutuqlarini alohida e'tirof etgani qalbimizni iftixorga to'ldirdi, – deydi yosh sportchi Mohinur Ahmadjonova. – Biz, O'zbekiston yoshlari yaratilayotgan keng imkoniyat va g'amxo'rliklarga sportda ham, o'qishda ham faqat yuksak natijalar bilan javob beramiz. Chunki bu ishonch bizni yuksak g'alabalar sari undaydi.
– Qo'lga kiritilayotgan muvaffaqiyatlarda Prezidentimiz rahnamoligida bolalar sportini rivojlantirishga qaratilayotgan doimiy e'tibor muhim omil bo'lmoqda, – deydi 23-olimpiya zaxiralari ixtisoslashtirilgan bolalar va o'smirlar sport maktabi direktori Ravil Vishnyakov. – Suv sportiga ixtisoslashtirilgan maktabimizda vaterpol uchun mo'ljallangan uchta suzish havzasi bo'lib, xalqaro talablarga to'liq javob beradi. Yozgi sport maydoni, engil atletika maydoni, trenajyor zalida sportning boshqa turlari bilan ham shug'ullanish imkoniyati mavjud.
Namanganlik sportchi yoshlarning sevimli maskani bo'lgan ushbu maktab viloyatda suv sportining rivojlanishi, o'sib kelayotgan yosh avlod, xususan, qizlarning sog'lom va barkamol ulg'ayishi, mamlakatimiz sport salohiyatini yanada yuksaltirishga munosib hissa qo'shmoqda.
Manzil: UzA, olympic.uz
— deya xabar beradi uff.uz nashri.