Oliy liga 2-turida “Paxtakor” jamoasi o'z maydonida “Qo'qon-1912” jamoasini qabul qilib, 4:0 hisobida yirik g'alabani qo'lga kiritdi. Uchrashuvdan so'ng tashkil etilgan matbuot anjumanida “Qo'qon-1912” ustozi Murod Ismoilov o'yin haqida o'z fikrlarini aytib o'tdi. “Bugun o'yinimiz umuman qovushmadi. Boshqacha izoh shart emas deb o'ylayman. Tahlil qilib chiqqach, xatolarimizni bilib olamiz. Buni ikki og'iz gap bilan tushuntirish qiyin. Jamoani shakllantirishda o'zim tanlagan o'yinchilardan foydalanaman. Natija yomon bo'lgan ekan, bunda men aybdorman. Qurbonov jarohatdan qaytgandi va u o'yinga to'liq tayyor emas ekan. Shu sababli uni birinchi bo'limdayoq almashtirdim. Turli jihatlarda kamchiliklarga egamiz. Ularni tuzatish ustida ishlashimiz kerak. Tarkibda jami 9 o'zgarish bo'lgan. Lekin yangi futbolchilar bo'lgan taqdirda ham bundan yaxshi o'yin namoyish qilishimiz lozim. Yigitlarga maydonda amalga oshirish kerak bo'lgan ko'rsatmalarni aytgandik, lekin ular buni bajara olishmadi. Futbolchilarni tanlashda xato qilgan bo'lishim mumkin. Ba'zida bunday o'yinlar ro'y berib turadi. Gap yirik hisobda yutqazishda ham emas. Har doim jangovar o'ynashga, oxirigacha kurashishga intilish shart”, – deydi Murod Ismoilov. 
— deya xabar beradi uff.uz nashri.