Hash-pash deguncha, italiyalik mashhur yarim himoyachi, jarima zarbalari ustasi, maydonnni ko'ra olishi bilan barchani hayratlantiradigan Andrea Pirloning Evropani tark etib, AQSh milliy chempionatiga ko'chib o'tganiga ham 8 oydan oshdi. Xo'sh, hozirgi paytda Pirloning okean ortidagi hayoti qanday kechmoqda? Unga Qo'shma Shtatlar nimasi bilan ko'proq manzur bo'lmoqda? Quyida ana shular haqida hikoya qilinadi.
Andrea Pirlo dunyodagi ko'plab futbol ishqibozlar uchun shunchaki, tengsiz timsoldir. Zero, u bir qator yirik klublar sharafini himoya qilib, EChLda 2 marta, milliy chempionatlarda 6 marta chempionlikni tantana qilgan. Unutilmas 2006 yili esa Italiya terma jamoasi bilan jahon chempionatida g'olib chiqdi. Darvoqe, Pirlo bungacha o'z mamlakatida 3 marta yilning eng yaxshi futbolchisiga beriladigan sovringa ham ega chiqqandi.
Serishtiyoq va jo'shqin tabiatli italyanlar bejiz uni «Motsart» yoxud «Professor», deya ulug'lamaydilar. Andreaning «Fikrlayman, shunga qarab o'ynaymay», deb atalgan avtobiografiyasi 2013 yili minglab nusxada sotuvga chiqdi va qo'lma-qo'l bo'lib ketdi. Ijtimoiy tarmoqlarda esa Pirloning birgina soqoliga bag'ishlangan sahifalarning o'zi tiqilib yotibdi. Google tizimiga berilgan har qanday tezkor qidiruv «Andrea Pirloning hozir yashayotganlar orasida eng buyuklardan biri ekanini isbotlovchi 37 dalil» kabi maqolalarni ko'plab topib beradi. E'tiborlisi, u ko'pgina hamkasblaridan farqli ravishda, bir emas, 2 nafar Rim Papasi bilan yuzma-yuz ko'rishgan.
Lekin bularning hech biri Pirloning Nyu-Yorkdagi yangi hayotiga unchalik ta'sir qilmayapti. U o'tgan yili yozda «Nyu-York» klubi bilan 2,5 yilga mo'ljallangan shartnoma tuzib, barchani hayron qoldirgandi. Mana, shundan buyon Pirlo Major League Soccerda to'p surib kelmoqda. E'tiborlisi, 36 yoshga kirgan breshiyalik futbolchining suratlari hamon matbuot uchun eng «xaridorgir mahsulot»lardan bo'lib turibdi. Bugun ham uning mashg'ulotdan chiqishini Amerikaning sportga oid jurnallari xodimlari intiqlik bilan kutib turishadi. Ana, uzoqdan Pirloning qorasi ko'rindi. Andreaning tashqi qiyofasi chakki emas: egnida katak-katak Massimo Piombo pidjagi, soch va soqoli ham risoladagidek. Suratkash yordamchisi noutbuk ekraniga tikilib, futbolchi uchun manzara tanlamoqda. Yaqin atrofdan o'tib ketayotgan odamlar bu holatga uncha e'tibor qaratishmaydi ham. Ammo shu payt Nyu-York bo'ylab sayohat qilib yurgan 3 nafar italiyalik sayyoh futbol afsonasini tanib qolib, unga xitob qilishadi: Ciao, Andrea! Faqat, shundan keyingina odamlar Pirlo bilan yonma-yon turishganini payqab, undan dastxat olishga urinadilar. Tajribali futbolchi esa sirli jilmayib, suratga tushishda davom etadi...
Shunisi qiziqki, Pirloning Amerikadagi hayoti uning MLSda to'p surgan yana bir taniqli hamkasbi, dunyoga tanilgan yulduzlardan biri - Devid Bekxemnikidan keskin farq qiladi. Masalan, Beks yashash uchun qulayligini hisobga olib, Los-Anjelesda istiqomat qilayotgan bo'lsa, Pirlo garchi xavfliroq sanalsada, Manxettanni tanladi. Qolaversa, u Devid kabi «Kadillak»da emas, piyoda yurishni afzal ko'radi. Oqshomlari esa Manxettandagi «Xay-Layn» xiyobonida sayr qiladi yoxud Bronksda golf o'ynaydi. O'tgan yilning oktyabrida esa uni Salomon Guggenxaym muzeyida ham ko'rishdi. Keyinroq ma'lum bo'lishicha, futbolchi u erga italiyalik rassom - Alberto Burrining asarlarini tomosha qilish borgan ekan. Tabiiyki, bu - futbolchilar uchun nodir holat. Aytgancha, Andrea istagan vaqti shahardagi «Felidiya» kafesiga ham bemalol borib-kelmoqda. Ma'lumotlarga qaraganda, mazkur ko'ngilochar dargoh Pirloning qaysidir do'stiga qarashli ekan.
- Men Nyu-Yorkda hatto odam eng gavjum restoranlarda ham bemalol tushlik qilyapman. Italiyada esa buning sira iloji yo'q edi, - deydi Pirlo. Chindan ham, uzoq yillar davom etgan muxlislar e'tibori, politsiya qurshovidagi yurishlardan so'ng Nyu-Yorkdagi xotirjamlik Andreaga juda manzur tushmoqda.
- Italiyada ba'zida shunday kunlar ham bo'lgandiki, biz uyimizga bexavotir etib olish uchun kiyinish xonasida yarim kechagacha qolib ketardik, - deb eslaydi u. - Chunki raqib jamoa ishqibozlarining avtobusga hujum qilishlari hech gap emasdi.
O'tgan yilning iyun oyida Pirloning «Yuventus» bilan tuzgan shartnomasi nihoyasiga etdi va u o'zini AQSh chempionatida sinab ko'rishga qaror qildi. Qizig'i, vaqtlar kelib, voqealar rivoji shunday tus olishini futbolchining o'zi ham kutmagandi. Hattoki, «Yuventus» bilan tuzilgan shartnomasining so'nggi oylari o'tib borayotgan vaqt ham Pirlo futboldagi ishlari shunchalik yurishib ketishiga ishonmagandi:
- Aslida doimo Amerika chempionatida to'p surishni xohlaganman. Lekin bu yana 2-3 yildan so'ng ro'y beradi, deb o'ylagandim.
E'tiborlisi, Nyu-yorklik futbol ishqibozlari ham xuddi shu gapni aytishlari mumkin. Aslida-ku, shahar superyulduz hisoblangan sportchilarga juda boy. Masalan, Aleks Rodriges, Ilay Menning, Karmelo Entoni kabi yulduzlar aynan shu erda yashashadi. Yana bir diqqatga sazovor jihati shuki, garchi Pirlo jamoa safiga mavsum o'rtasida qo'shilgan bo'lsa-da, uning oxiriga kelib, golga hammualliflik qilish bo'yicha 3-o'ringa ko'tarilib oldi. Qolaversa, uning mahorati klub o'rinbosarlari uchun o'ziga xos namunadir.
- Pirloning harakatlarini kuzata turib, futbolchi sifatida katta o'sishga erishasan, - deydi NYC FC klubining eng umidli yoshlaridan biri Kiri Shelton. - Qaysidir lahzalarda shunday buyuk futbolchi bilan elkama-elka to'p surayotganimga ishonolmay qolaman, hatto...
Davomi InterFUTBOL gazetasi blogida.
— deya xabar beradi uff.uz nashri.