Afsuski, boshqa ko'pgina sport turlari qatori futbol ham ayrim illatlardan xoli emas - ajoyib kombinatsiyalar, fantastik gollarni hadya etadigan murosasiz kurash jarayonida ba'zan g'irromliklar, kelishilgan o'yinlar va hakamlarning qaysidir jamoalarga yon bosishlari kabi halollikka zid bo'lgan holatlar kuzatiladi.
Chiken - geyt
2011 yilda Gilermo Ochoa etakchiligidagi Meksika terma jamoasining 5 nafar futbolchisi doping sinovlaridan o'ta olishmadi. Iyun oyida bo'lib o'tgan KONKAKAF kubogi turnirida bu futbolchilarning organizmida mushaklar quvvatini oshirishga yordam beradigan klenbuterol moddasi borligi aniqlangandi. Meksika futbol federatsiyasining mutasaddilari bu qonunga zid hodisani futbolchilarning aynigan tovuq go'shtini iste'mol qilganliklari bilan izohladilar. Buni qarang­ki, o'ta ajablanirli bahona futbolchilarni jazodan qutqarib qoldi. Yakunda Meksika turnir g'olibiga aylangach, noxush voqeani tezda «bosti-bosti» qilishdi.
Hushtaklilar mafiyasi
Braziliya futbolidagi eng yirik futbol mojarosi 2005 yilda kuzatilgan. O'shanda mamlakat chempionatida faoliyat yurituvchi ikki hakam - Edilson Pereyra di Karvalo va Paulu Joze Danelonlar tergov uchun politsiya mahkamasiga olib kelinadi. Ularga qarshi to'plangan dalillar shu qadar asosli ediki, ikkala hakam ham chor-nochor mamlakat oliy divizionidagi bir qator o'yinlar natijasiga ta'sir ko'rsatish uchun katta miqdorda pora olishganiga iqror bo'lishadi. Ma'lum bo'lishicha, bu «olg'ir» hakamlarni totalizatordan pul ishlashni maqsad qilgan mahalliy bir «tadbirkor» yollagan ekan. Buning natijasida shubha ostida qolgan bir necha o'yinlar hisobi yo'qqa chiqarildi.
Kalchioskomesse
Evro-2012 bahslari boshlanishi arafasida Italiya politsiyasi ketma-ket hibsga olishlarni amalga oshira boshladi. Zero, mamlakat futbolida shubhali o'yinlar soni haddan ortiq ko'payib ketgandi. Xullas, gumon ostida qo'lga olinganlar orasida «Atalanta» sardori Kristiano Doni va Italiya terma jamoasining sobiq a'zosi Juzeppe Sinorilar ham bor edi. Aytgancha, tergovlar oqibatida «Atalanta» va «Siena» singari klublar jarimaga tortilib, muhim ochkolardan mahrum bo'lishdi.
Germaniyalik yulg'ich
2005 yil boshlarida Germaniya oddiygina bir hakamning qing'ir ishlaridan lol bo'lib qoldi. Chunki Robert Xoytser ismli bu kimsa bukmekerlik idoralariga pul tikib, katta mablag' orttirib olish niyatida bir qator uchrashuvlar natijasiga ta'sir o'tkazib kelgan ekan. Masalan, u «Gamburg» va «Paderborn» jamoalari o'rtasidagi uchrashuvda o'z niyatini amalga oshirish uchun Emil Mpenzani asossiz ravishda maydondan chetlatib, yana ikkita penalti ham belgilagan. Muhimi, tergov yakuniga ko'ra, Xoytser qilmishiga yarasha jazolandi: u 29 oy qamoqda o'tirdi.
Panjara ortidagi «masxaraboz»
Qizig'i shundaki, hatto mahalliy futboli u qadar ommaviy bo'lmagan Avstraliya ham totalizatorlar «hujumi»ga duchor bo'lgan. Aniqrog'i, 2013 yili kelishilgan o'yinlarni tashkil qilishda ayblanib, yarimprofessional hisoblangan «Sautern Starz» klubining besh nafar a'zosi qo'lga olinadi. Ma'lum bo'lishicha, ularni Segaran Subramani ismli masxaraboz yo'ldan urgan ekan. Tergov-surishtiruv ishlari yakunida qonunbuzar bir yillik qamoq jazosiga hukm qilindi. Ammo u «o'tirib chiqib» bo'lsa-da, baribir, 2 millionlik yutuqni qo'lga kiritdi.
Davomi InterFUTBOL gazetasi blogida.
— deya xabar beradi uff.uz nashri.