Osiyo Chempionlar ligasi doirasida “Paxtakor” va “Traktorsozi” klublari o'rtasida kechadigan uchrashuv oldidan o'tkazilgan matbuot anjumanida raqib jamoa bosh murabbiyi Amir Galenoi va eronliklar darvozaboni Muhammad Rizo ishtirok etdi. Avvalo murabbiy o'yin haqidagi fikrlarini bildirib o'tdi.
- Eng avvalo hammaga salom aytmoqchiman. Toshkentga uch yoki to'rtinchi marta kelmoqdaman va bu erda ko'plab do'stlarga egaman. Ayni vaqtda O'zbekiston terma jamoasi bosh murabbiyi Samvel Babayan ham do'stimdir. “Paxtakor”ga keladigan bo'lsak, bu klub ayni vaqtda Oliy ligada birinchi o'rinda bormoqda va ertaga bo'ladigan o'yin ancha og'ir kechishi turgan gap. Biz Chempionlar ligasi guruh bosqichidagi o'rinlarga qaramoqchi emasmiz. Ertaga bo'ladigan o'yin muhim ahamiyat kasb etadi. Hozircha biz OChLda yaxshi ishtirok etmoqdamiz va ikki o'yinda ikki marta g'olib chiqdik. Ertaga bo'ladigan o'yindagi g'alaba esa guruhdan chiqish imkonini berishi mumkin.
- Mehmonda to'p surayotganingiz sizga ta'sir o'tkazmaydimi? Avval raqib jamoa o'yinini o'rganish uchun himoyadan o'ynaysizmi yoki darhol hujumga o'tish rejangiz bormi?
- Har bir o'yinga alohida reja tuzamiz. Ertaga bo'ladigan o'yinda ham shunday bo'ladi. Masalan “Al Jazira”ga qarshi kechgan o'yinda ilk daqiqalardan raqibga bosim o'tkazib, mag'lubiyatga uchratgan edik. “Paxtakor”ga qarshi kechadigan o'yinda ham ilk daqiqalardan raqibga bosim o'tkazish maqsadimiz bor. Agar “Paxtakor”ga qarshi kechadigan navbatdagi ikki o'yinda ochko ishlay olsak, guruhdan chiqish masalasi hal bo'ladi.
- Eronlik mutaxassis sifatida oxirgi yillarda Eron futboli saviyasi pasaygani haqida nima deya olasiz? Oxirgi marta 2007 yilda “Sepaxon” OChL finalida o'ynagan edi...
- Buning sababi taqvimdan bo'lishi mumkin, deb o'ylayman. OChL taqvimi bizning mintaqa manfaatlariga to'g'ri kelmaydi, deb o'ylayman. Biz guruhdan chiqqanimizdan so'ng hal qiluvchi uchrashuvlarga etarlicha o'yin amaliyotisiz boramiz. Chempionlar ligasida g'olib chiqa olmayotganimiz sababi shunda, deb o'ylayman.
-  Jamoa legionerlaridan faqat Avgusto to'liq o'ynadi, qolganlar esa o'yin oxirida zaxiradan maydonga tushmoqda. Bunga sabab nimada, ularda jarohat bormi?
- Har bir jamoaning o'z tarkibi bo'ladi. Biz chempionatda asosan legionerlardan foydalanamiz, Chempionlar ligasida esa faqat Avgustodan foydalanib, ikkita o'yinda g'alabaga erishdik. Bu esa biz tutgan yo'l to'g'ri ekanini bildiradi. Hozir legionerlarimiz maydonga tushishga shay bo'lib turibdilar va balki keyingi o'yinlarda ulardan foydalanarmiz.
-  Darvozabon Muhammad Rizoga savolim. O'yin oldidan “Paxtakor” futbolchilarini o'rgangan bo'lsangiz kerak. Ulardan qay biridan ko'proq xavf kutmoqdasiz?
- “Paxtakor” tarkibida kuchli futbolchilar ko'p. Bizga murabbiylar raqib jamoa futbolchilari haqida ma'lumot etkazishadi va raqib haqida etarlicha ma'lumotga egamiz. Jamoadoshlarim ertaga yaxshi himoyalanib, raqibning kuchli futbolchilariga qarshilik ko'rsata olamiz, deb o'ylayman.
— deya xabar beradi uff.uz nashri.