Osiyo Chempionlar Ligasi asta-sekin qizg'in pallaga kirib bormoqda. Guruh bosqichining har bir turidan so'ng jamoalarning saragi-sarakka, puchagi-puchakka ajraladi. Afsuski, bu borada o'zbek klublari ko'p ham maqtana olmaydilar. O'tkazilgan ikki tur bahslarida klublarimiz umumiy hisobda 8ta o'yin o'tkazib, shundan faqat bittasida g'alabaga erishdilar («Nasaf»-«Al-Ahli»-2:1). Yana to'rtta bahsda durang qayd etilgan bo'lsa, qolgan uchta uchrashuv boy berildi. Bu esa kelajakka optimistik ruhda qarash imkonini bermasligi aniq. Xo'sh, o'tgan mavsum jamoalarimiz bu vaqtda qanday natija qayd etgan edilar?
O'TGAN MAVSUM
Osiyo Chempionlar Ligasining o'tgan mavsumi o'zbek futboli tarixidagi eng yomonlaridan biri bo'lib qolishi turgan gap. Bunga sabablar ham etarli. O'tgan mavsum xuddi bu yil bo'lgani singari to'rt klub - «Lokomotiv», «Paxtakor», «Bunyodkor» va «Nasaf» yurtimiz sharafini himoya qilgan, aniqrog'i, himoya qilolmagan edi. Klublarimizning birortasi guruh bosqichidan o'tolmadi va ancha sharmandali natija qayd etildi.
Agar o'tgan mavsum qayd etilgan natijalarga qaraydigan bo'lsak, ancha yoqimsiz holatga duch kelamiz. Masalan, «Bunyodkor» guruhda o'tkazilgan 6 uchrashuvning birortasida g'alaba qozona olmagan va faqat bittasida durang natija qayd etgandi («Al-Nasr»-«Bunyodkor»-1:1). Qolgan barcha uchrashuvlar «qaldirg'ochlar»ning mag'lubiyatlari bilan yakun topgan. Bu - o'zbek klublari orasida qayd etilgan eng yomon natija hisoblanadi.
Biroq qolgan klublar ham erishgan natijalari bilan maqtana olishmaydi. Jumladan, «Lokomotiv» bitta durang va bir g'alabaga erishib, qolgan uchrashuvlarni boy bergan bo'lsa, «Paxtakor»da vaziyat birozgina yaxshiroq tus olgan. «Sherlar» guruhdagi bir g'alaba va uchta durangdan so'ng 6 ochko ishlaganlar. Ammo bu ochkolar «paxtakorchilar»ning guruhdan chiqishlari uchun etarli bo'lmadi.
O'tgan mavsum o'zbek klublari orasida eng yaxshi natija qayd etgani Qarshining «Nasaf» klubi bo'ldi. Ro'ziqul Berdiev shogirdlari guruhda ikki g'alaba va ikki durangga erishib, 8 ochko to'plagan edilar. Afsuski, qo'shimcha ko'rsatkichlarga ko'ra, Dubayning «Al-Ahli» klubi omadliroq chiqib, qarshiliklar guruhda qolib ketgandilar. Shu tariqa, o'zbekistonlik futbol muxlislari «pley-off» bosqichidan bebahra qoldilar.
Xo'sh, bu yil ahvol qanday bo'lar ekan? Keling, ushbu savolga o'tkazilgan ikki tur o'yinlariga qarab javob topishga urinib ko'rsak...
«BUNYoDKOR»
«Qaldirg'ochlar» uchun o'tgan yildan buyon deyarli hech narsa o'zgargani yo'q - avval ham Lushan jamoa bosh murabbiyi bo'lib turgan edi, hozir ham. Bitta farq - o'tgan yilgi omadsizliklardan so'ng Sergey Lushan iste'foga chiqarilgan va klub boshqaruvi tarixida yangilik joriy etilib, jamoa rahbari sifatida Baxtiyor Boboev natija uchun javobgar etib tayinlangandi.
Ammo Boboev qilgan birinchi ish - Lushanni yana qaytarib olib kelish bo'ldi. Oqibatda, «qaldirg'ochlar» uchun tarix yana takrorlanmoqda. «Bunyodkor» xuddi o'tgan mavsumda bo'lgani singari OChL guruh bosqichi uchun o'tkazilgan saralash bahsida yorqin o'yin namoyish etdi va «Al-Shabab»ni mag'lubiyatga uchratdi. Bu o'yin hammaning yodida bo'lsa kerak. Xuddi o'tgan yili «Al-Jazira»ga qarshi kechgani singari...
Ammo shu bilan «Bunyodkor» uchun yorqin davr tugagandek ko'rinmoqda. Chempionlar Ligasi guruh bosqichida o'tkazilgan ikki turda «qaldir-g'ochlar» avval «Al-Nasr» bilan durang o'ynashdi (3:3), keyin esa shu jamoa bilan o'z maydonlarida bo'lgan bahsni 0:1 hisobida boy berdilar. Ayni vaqtda «Bunyodkor» 1 ochko bilan guruhda uchinchi o'rinni egallab turibdi.
Qiziq tomoni, roppa-rosa bir yil oldin ham «Bunyodkor» xuddi shunday natija bilan guruhda oxirgi o'rinlarda turgan edi. «Qaldirg'ochlar» o'tgan mavsumni ham «Al-Nasr» (bunisi boshqa «Al-Nasr» - Dubayniki) bilan 1:1 hisobida durang o'ynab boshlagan edilar. Ikkinchi turda esa o'z maydonlarida «Persepolis»dan mag'lub bo'lib (0:1), orzularimizni sarobga aylantira boshlagandilar. Bu yil ham xuddi shu tarix takrorlanmoqda.
«Sug'ur kuni»mi? Qiziq savol. Bu turishda butun boshli mavsum «Bun-yodkor» uchun sug'ur yiliga aylanib qolmasa bo'ldi edi...
Davomi InterFUTBOL gazetasi blogida.
— deya xabar beradi uff.uz nashri.