«MYu»da talab darajasida faoliyat yuritolmagan David Moyes o'rnini egallagan Lui van Gal jamoaning avvalgi shon-shuhratini tiklash maqsadida shu kungacha bir qator xaridlarni amalga oshirdi. Lekin «qizil iblislar» hanuzgacha o'zlariga kelolmayaptilar...
Yaqinda gollandiyalik mutaxassis jamoa a'zolarining 13 nafarida jarohat borligini bahona qildi. Joriy mavsumdagi beqaror ishtirokdan shunday tasavvur uyg'onadiki, nafaqat muxlislar, matbuot vakillari, jamoaning sobiq va hozirgi ayrim o'yinchilari, balki taqdir ham Lui van Galga qarshidek, go'yo. Harqalay, tarqalgan jarohatlar «epidemiyasi»ni nima bilandir izohlash juda qiyin. Ehtimol, barcha aybni taqdirga ag'darish insof doirasiga kirmas. Balki buning sababi futbolchilarning jismoniy tayyorgarliklari talab darajasida emasligidadir... Axir shunday noxush manzara o'tgan yili ham kuzatilgandi-da.
Raqamlarda aytsak, avvalgi mavsum davomida «MYu» o'yinchilari naq 39 marta shikastlanishgan. Joriy chempionatning hozirgi holatiga qadar esa ular bu natijani «yaxshilash»ga ulgurishdi. Ayrim manbalarning xabariga ko'ra, jarohatlar soni 41ta etgan. Bu borada «MYu» hattoki, jafokash «Arsenal»dan ham o'zib ketdi. Ammo muammo faqat jarohatlarda emas. Zero, 2 yildan buyon jamoada davom etayotgan kadrlar masalasidagi chigalliklarni izohlashga futbolchilarning safdan chiqayotganliklari etarli asos bo'lolmaydi. To'g'rirog'i, murabbiyning optimal tarkibni shakllantirish yo'lidagi omadsiz urinishlari kadrlar qo'nimsizligini keltirib chiqardi. Lekin raqobatbardosh jamoadan hamon darak yo'q.
Xo'sh, van Gal yaxlit jamoa shakllantirish uddasidan chiqadimi? Gollandiyalikning dastlabki daqiqalardan qaysi futbolchilarni maydonga tushirishini oldindan aytish umuman ilojsiz. Qarang, murabbiy 1-davraning o'zida 32 nafar futbolchi xizmatidan foydalandi. Bu fantastik ko'rsatkich tasavvur qilish ham juda qiyin muammo - beqarorlikdan dalolatdir. Joriy mavsum maydonda eng ko'p to'p surgan o'yinchi - bu Kris Smolling. Tirishqoq futbolchi uchun ajoyib natija. Biroq u jamoa ramzi bo'lishga munosibmi?
Deyli Blind, David de Xea, Xuan Mata va Ueyn Runida ham o'yin vaqti oz emas. Lekin bu futbolchilarning «MYu»ga kelishlarida van Galning umuman aloqasi yo'q. U dastlabki mavsumda u jamoani avvalgi yuqori maqomga qaytarish maqsadida kichik inqilobni amalga oshirdi, bir yildan keyin yana islohotni davom ettirdi. Shu davr ichida «MYu»ga kelib-ketgan futbolchilardan EChL guruh bosqichida bemalol munosib to'p suradigan jamoa shakllantirish mumkin edi. Ayni payt «MYu»ning tarkibida asosan yoshlar maydonga tushyaptilar. Xullas, qo'nimsizlik «qizil iblislar» uchun asosiy xususiyatlardan biriga aylanib qoldi. Eng achinarlisi, ana shu qo'nimsizlik katta xarajatlar evaziga yuzaga keldi.
Chunonchi, van Gal 2 yil ichida tarkibni kuchaytirish uchun chamasi 340 mln. evro sarfladi. Xaridlarning hozircha etarli samara bermagani ham bor gap. Ularga tegishli foydali ish koeffitsientini aniqlash o'ta mushkul vazifa. Lekin bitta bellashuv misolida ko'rib chiqish iloji bor. Keling, «MYu»ning so'nggi uchrashuvlaridan biri («Sanderlend»ga qarshi - 1:2)da van Gal tomonidan sarflangan millionlar evaziga kelgan futbolchilar bergan effektni aniqlaylik. Xullas, o'sha oqshom «MYu»ning boshlang'ich tarkibida van Gal tomonidan 120,5 mln. evro evaziga xarid qilingan futbolchilar maydonga tushdilar. Darvoqe, bu hammasi emas - axir o'yinga zaxiradan qo'shilganlar ham bor-ku! Shunday qilib, van Gal tomonidan olib kelingan futbolchilarning umumiy qiymati 148 mln. evroni tashkil qildi.
Umuman, gollandiyalik davrida xarid qilingan va hozir jamoa sharafini himoya etayotgan futbolchilar qiymati o'rtasidagi farq 200 mln. evroni tashkil etmoqda. Xo'sh, ular qaerda? Ayrimlari Frantsiyada binoyidek to'p surib, EChLda ajoyib uzatmalarni amalga oshirmoqdalar, ba'zilari Germaniyada yuksak saviyani namoyish etmoqdalar. Yana kimlardir, masalan, Shvaynshtayger va Roxoga o'xshaganlar jarohatdan forig' bo'lishga intilishmoqda. Ander Errera esa hozircha asosiy tarkibdan joy ololmayapti.
Jarohatlanganlar orasida Lyuk Shouni alohida aytish joiz. Bu futbolchiga qancha sarflanganidan qat'iy nazar, uning shikastlanishi - tasodifiy falokat. Bu transferni van Galning omadsizligi sifatida baholash adolat va odob-axloq mezonlariga ziddir. Bundan tashqari, klub gollandiyalik murabbiy bilan kelisholmagan ayrim futbolchilarning sotuvidan binoyidek daromad oldi. Mana shu ijobiy jihat futbolchilar saviyasi talab darajasida bo'lganiyu, «MYu»dan munosib joy ololmaganliklari ularning aybi emasligini yaqqol ko'rsatib turibdi. Demak, omadsizlikka avvalo, klubdagi muhit, birinchi navbatda, bosh murabbiy aybdor.
Davomi InterFUTBOL gazetasi blogida.
— deya xabar beradi uff.uz nashri.