“Bunyodkor” – “Zob-Ahan” uchrashuvi oldidan tashkil etilgan matbuot anjumanining birinchi qismida eronliklar ishtirok etishdi. Bosh murabbiy Yahyo Gulmuhammadiga himoyachi Hadi Muhammadi xamrohlik qildi. - Eng avvalo, “Bunyodkor” FKga ajoyib mehmondo'stlik uchun minnatdorchilik bildirmoqchiman. O'yinga keladigan bo'lsak, bizni qiyin bahs kutib turibdi. Raqib jismonan va texnik jihatdan juda kuchli futbolchilarga ega. Agar biz g'alaba qozonishni istasak, u holda e'tiborni bir zumga ham to'xtatmay, xato qilmasligimiz kerak. Gol urish uchun esa to'pni ko'proq o'zimizda saqlab turishimiz va yaratilgan har qanday imkoniyatdan samarali foydalanishimiz kerak. Umuman olganda, ertaga muxlislar uchun juda chiroyli o'yin namoyish etiladi, deb o'ylayman. “Bunyodkor” judayam hurmatga loyiq jamoa. Ularga ham g'alaba suv va havodek kerak, - deydi “Zob-Ahan” bosh murabbiyi. - Eron klublari ko'proq himoyaga e'tibor qaratishadi. Ertaga ham ko'proq orqa chiziqqa e'tibor qaratasizlarmi? - Futbolda eng asosiysi tartibli o'yin namoyish etish kerak. Biz ham shu jihatdan kelib chiqqan holda, himoyani mustahkam ushlab, qarshi hujumlardan foydalanishga harakat qilamiz. - “Bunyodkor” safida eng xavfli futbolchi, deb kimni aytgan bo'lardingiz? - Raqibning uchta hujumkor futbolchisini alohida ta'kidlab o'tishni istardim. Bu “trio” har qanday vaziyatdan ham gol urishga intiladigan, kurashuvchan yigitlar. Biz asosan ularni zararsizlantirishimiz kerak. - “Zob-Ahan” ikki uchrashuvda atigi bitta gol urdi. Bu Sizni tashvishga solmayaptimi? - Futbolda bitta gol to'rt ochko olib kelishi ham mumkin. Hadi Muhammadi ("Zob-Ahan" himoyachisi): Hammaga salom! “Bunyodkor”ni judayam kuchli jamoa, deb bilamiz. Raqibning himoya chizig'i juda ham tartibli o'yin namoyish qiladi. “Zob-Ahan” juda yosh jamoa. Biz ertangi bahsga jiddiy tayyorgarlik ko'rdik. Shu bois eng yaxshi o'yinlarimizdan birini namoyish etishga tayyormiz.
— deya xabar beradi uff.uz nashri.