Avval xabar qilganimizdek, joriy yilning 18-20 mart kunlari Qozog'iston poytaxti Astana shahrida sport kurashlari bo'yicha “Rio-2016” o'yinlari yo'llanmasi uchun Osiyo saralash turniri o'tkaziladi.
Qit'aning etakchi polvonlari ishtirokida bo'lib o'tadigan mazkur nufuzli musobaqada quyidagi sportchilar Vatanimiz sharafini himoya qiladilar:
Yunon-rim kurashi - Elmurat Tasmuradov (-59 kg), Aram Vardanyan (-66 kg), Dilshod Turdiev (-75 kg), Suhrob Fattoev (-98 kg), Mo'minjon Abdullaev (-130 kg). Murabbiylar: Kamil Fatkullin, Rustam Qudratov.
Erkin kurash - Nodirjon Safarov (-57 kg), Rashid Qurbanov (-74 kg), Umidjon Ismanov (-86 kg), Magomed Ibragimov (-97 kg), Hasanboy Rahimov (-125 kg). Murabbiylar: Aleksandr Nedorezov, Kurban Kurbanov.
Ayollar kurashi - Dauletbike Yaxshimuratova (-48 kg), Zuhra Mustanova (-53 kg), Salomat Kuchimova (-58 kg), Nilufar Gadoeva (-63 kg), Baxtigul Boltaniyozova (-69 kg), Lolaxon Orinbaeva (-75 kg). Murabbiy: Axmet Kagarmanov.
Qoidaga ko'ra qit'aviy saralash turnirlarida barcha yo'nalishlar bo'yicha har bir vazn toifasida faqatgina finalchilar Olimpiada o'yinlarining yo'llanmalariga ega bo'ladilar.
“Ayni paytda jismoniy holatimdan ko'nglim to'q. Bolgariya hamda Belarus davlatlarida o'tkazilgan xalqaro turnirlar o'ziga xos tayyorgarlik bosqichi vazifasini ham o'tab berdi. Har ikki musobaqada ham sovrinli o'rinlarni egalladim. Bu esa o'zimga bo'lgan ishonchni yanada oshirdi. Men oldimizga qo'yilgan vazifani uddalashga tayyorman. Shundan so'ng, butun e'tiborni Rio o'yinlari tayyorgarligiga qaratish mumkin. Olimpiadada ham sovrindorlar safidan o'rin egallashni maqsad qilganman. Astanadagi turnir terma jamoamiz a'zolarining barchasi uchun o'ta muhim. Ularning aksariyatida yo'llanmalarni qo'lga kiritish imkoniyatlari yuqori. O'ylaymanki, yaqin kunlarda muhlislar ajoyib hushxabarlarni eshitadilar”, - deydi Rashid Qurbonov.
Eslatib o'tamiz, 2015 yili Las-Vegas (AQSh)da bo'lib o'tgan jahon chempionatida ikki nafar hamyurtimiz Ixtiyor Navro'zov (-65 kg, erkin kurash) va Rustam Assakalov (-85 kg, yunon-rim kurashi) kumush medallar bilan birga “Rio-2016” o'yinlarining yo'llanmalarini ham qo'lga kiritishgan edi.
Umid qilamizki, polvonlarimiz Osiyo qit'aviy saralash turnirida munosib ishtirok etadilar va XXXI yozgi Olimpiada o'yinlariga yo'llanma oladigan sportchilarimiz safi yanada kengayadi. Bu yo'lda hamyurtlarimizga omad va zafarlar tilab qolamiz. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.