Muxlislar hozirdanoq kulib qo'yishmoqda. Ularning fikricha, «Olmaliq»ning ochkosizligi shunchaki, Igor Shkviringa xos qaysidir jamoalarga don sepish, xolos. U zarur payt shogirdlarini qanday o'ynatishni biladi. «Buxoro»ning bu yilgi shashti barchaga ma'lum. Jamoa oliy ligada mustahkam o'rin olishdan umidvor. Shunga yarasha, tarkib ham anchagina kuchaytirildi. Qisqasi, «Buxoro» ayni pallada gurullab yonib turgan olov kabidir. Demoqchimizki, buxoroliklar chempionatni g'alaba bilan boshlashlari shart edi.
«Olmaliq» esa yonib turgan olovga ko'r-ko'rona o'zini tashlaydigan jamoa emas. Shu bois, Igor Shkvirin 1-turda shogirdlarini kelgusi bahslar uchun asradi, nazarimizda. «Nasaf» bilan kechgan bahs ham «Olmaliq» uchun jiddiy sinovga aylanmadi. Negaki, shu kunlarda «ajdarlar» bilan hazillashib bo'lmaydi. Buni yaxshi tushunadigan Igor Shkvirin yana bir qadam orqaga chekindi. Yo'q, u ikki qadam ortga chekinishdan fojea yasamaydi. Igor Anatolevichni kelishilgan o'yinlarda ayblash ham noo'rin.
Shunchaki, u milliy chempionatimizda o'rtamiyona jamoani qanday boshqarish hadisini puxta egalladi. Harqalay, bir maromdagi murabbiy ekanligini, o'zini o'tu-cho'g'ga uravermasligini tajribali, «sayyor» futbolchilar ham bilib qolishdi. Moliyaviy jihatdan qiynalayotgan jamoada to'p suradigan yoki faoliyatida yuksalish sodir bo'lishini istagan saviyaliroq futbolchining «Olmaliq»qa yo'l olishi bugun ko'pchilikka ayon. Ta'bir joiz bo'lsa, Igor Shkvirin - murabbiy sifatida ko'plab futbolchilar talpinadigan Quyosh! Quyosh esa har doim ham hamma joyga nur sochavermaydi. Ya'ni nur sochish uchun ham payt poylaydi. Qolaversa, «Olmaliq»ning tarkibi yil sayin yangilanib boradi. Yangilangan tarkibdan esa birdan ijobiy natija kutish qiyin.
Biz «Olmaliq»ning dastlabki 2ta turdagi mag'lubiyatini mantiqan shunday izohladik. Fikrimizcha, Igor Shkvirin har ikki mag'lubiyatni ilojsiz holat, deb hisobladi. Keyingi turlarda esa vaziyat tubdan o'zgarsa kerak. Chunki «Olmaliq» odatda «Qizilqum» va «Metallurg» bilan boshqacha bellashadi har safar. Xullas, Toshkent viloyati klubining mavsum strategiyasi «Yaxshi ot keyin chopadi» maqolini eslatmoqda. Klub o'zi uchun zarur ochkolarni keyinchalik bemalol to'play olishiga ishonmoqda.
«Metallurg» va «Qizilqum» esa boshqacha yo'lni tanladi. Taqvimdagi holatga ko'ra, har ikki jamoa dastlabki uchrashuvlarda g'alaba uchun astoydil kurashdi. Doimiy o'zgarishsiz tarkibi bilan mashhur «Metallurg» bu vazifani u qadar qiynalmay uddaladi. Har ikki jamoaning voha safari saviyadoshlarning raqobatiga aylandiki, bundan «Metallurg» ham, «Qizilqum» ham ustalik bilan foydalandi. Mavsum avvalidagi bu ikki bahs yodingizda qolishini istaymiz, aziz muxlis. Kutaylikchi, ikkinchi davrada javob uchrashuvlari qanday kechadi?
Umid qilamizki, o'shanda ham «Metallurg» va «Qizilqum» faqat g'alaba qozonish haqida o'ylaydi. Bu nima degani? Bu jamoalar o'zaro kelishishdan voz kechishdi, deganidir. Harqalay, biz shu kabi ezgu xayollar og'ushidamiz. Jamoalar kelishilgan o'yinlarning mutlaqo xayolga kelmaydigan, isbotlanishi mushkul «mexanizmi»ni kashf etmagan bo'lsalar, albatta. O'ylaymizki, hozirgi vaziyat bunday emas. Mehmondagi g'alabalar jamoalarning maqsadi, taqvimdagi holat, mavsum davomida kuchlarning oqilona taqsimlash rejasi bilan aloqador.
O'zi «Lokomotiv», «Nasaf», «Bun­yodkor» kabi etakchilarning mehmonda ham g'alabaga intilishlari tabiiy. Yuqorida ta'kidlaganimizdek, shashti baland «Buxoro»ning debyutant - «Obod»dan ochko tortib olishini ham aksariyat muxlislar taxmin qilishgandi. Bu holatda-da o'zgachalik yo'q. Hattoki, «Neftchi»ning «Navbahor» ustidan kichik hisobda g'alaba qozonishi ham ko'pchilik uchun g'ayritabiiy tuyulmadi. «Neftchi» o'z maydonida, muxlislari ko'z o'ngida o'ynadi. Sevimli jamoasini qo'llash maqsadida Toshkent safariga borgan va uyga alamnok qaytgan muxlislar shodligi yo'lida «Neftchi» g'alaba uchun borini berdi. 3 ochko uchun borini berish shunday bo'ladi. Ochig'i, uchrashuvda diqqatga sazovor holat kuzatilmadi, hisob.
Ammo jamoalar g'alaba uchun jiddiy jon kuydirishdi. Andrey Fyodorov shogirdlari Angliya kubogi yarim finaliga yo'l olgan «Everton» va «Uotford» kabi maydonda ter to'kib to'p surishdi. To'g'ri, «Everton»ning raqibi «Chelsi», «Uotford»ni sinovdan o'tkazuvchi esa «Arsenal» edi. Ulug'vorlik APL o'rtamiyonalari siquviga bardosh berolmay ortga chekindi. Etakchilar nazarga ilmagan Romelu Lukaku va Odion Igaloga shon-sharaflar bo'lsin! Ular «Chelsi» va «Arsenal»ning nomdor darvozabonlarini, dongdor himoyachilarini uyaltirdilar. Pedro Rodriges va Diego Kosta, Aleksis Sanches va Olive Jiru kabi hujumchilar ularga havas bilan boqdilar. «Neftchi» esa o'zi kabi o'rtamiyona «Navbahor»ni engdi. Sherzod Hakimovga ham qoyil! U tarang vaziyatda bir amallab gol urishni epladi. Namanganlik muxlislar esa keyingi turni orziqib kutishmoqda. «So'g'diyona»ga qarshi o'yinda avvalgi turlarda «lochinlar» urmagan gollar «urho»si baralla yangraydi, ularning nazarida. Aks holda, jamoaga bu qadar jiddiy e'tibordan nima naf?! «Navbahor»ni isnoddan faqat g'alaba qutqaradi.
Davomi InterFUTBOL gazetasi blogida.
— deya xabar beradi uff.uz nashri.