Sizga yaxshi ma'lumki, “Kosonsoy” jamoasi ayni kunlarda mamlakat birinchiligiga qizg'in hozirlik ko'rmoqda. To'g'ri ayrim sabalarga ko'ra jamoa O'zbekiston kubogi musobaqasida ishtirok etmagan bo'lsada aprel oyining dastlabki haftasida boshlanajak 1-liga turniriga tayyorgarlik jarayonini o'tkazmoqda. Hozirda jamoada mahalliy futbolchilar bilan birga bir qator tajribali futbolchilar mashg'ulotlarda ishtirok etishmoqda. Xususan, Sardor Telyakov, Davron Isoqov, Sardor Asqarov, Muhammad Rasulov, Murod Xolmonov  kabi o'nlab tajribali futbolchilar ham “Kosonsoy” safida ko'rikdan o'tishmoqda. Futbolchilarni ayni kunlarda Abdulvosit Azizov, Mehmon Solixo'jaev,  Shuhart Bozorov va Olimxon Tursunxo'jaevdan iborat murabbiylar shtabi shug'ullantirib turishmoqda.
Klubga tegishli bo'lgan “Markaziy” o'yingoh joriy ta'mirdan chiqarildi va yangi mavsumga shay holatga keltirildi.
Aytgancha, o'tgan yilgi tarkibdan Aziz Matkarimov, Sardor Sotiboldiev, Abdurazzoq Jo'raevlar “Tsementchi”da, Islom Imoilov “Obod”da, Azizbek Mamazoitov va Mirg'ofur Abdulboqievlar “Navbahor”da o'z faoliyatlarini davom ettirishadigan bo'lishdi. O'z navbatida “Kosonsoy” ularga omad tilaydi...
Shu o'rinda aytish joizki “Kosonsoy” ayni kunga kelib PFL a'zolik badalidan mavjud bo'lgan qarzdorlikga barham bergan va bu boradagi turli mish-mishlarga o'rin qolmadi.
Shunday ekan, muxlislar joriy mavsumda ham “Kosonsoy”dan chiroyli va  mazmunli futbol kutib qolishadi. Eslatib o'tamiz, “Kosonsoy” dastlabki 2 uchrashuvni safarda, aniqrog'i Buxorada “Nurafshon” va “G'ijduvon”ga qarshi o'tkazadi.   
— deya xabar beradi uff.uz nashri.