Tobora «sensatsion» chempionlikka yaqinlashayotgan «tulkilar»ni har qancha e'tirof etsak ham oz. Axir ular joriy mavsum misli ko'rilmagan yuksalishni qayd etishyapti. Deylik, Klaudio Ranerining hozirgi yulduz shogirdlari yaqin-yaqingacha ham keng ommaga notanish edilar. Qisqasi, bugun ularning 4 yil oldingi va ayni paytdagi holatlariga birrov nazar solamiz.
Klaudio Raneri
O'sha vaqt: Liga 2da «Monako» bosh  murabbiyi
Hozir: Angliya chempionati etakchisi bosh murabbiyi
Raneri murabbiylik faoliyatining start bosqichida Italiya futbolidagi eng istiqbolli mutaxassislardan biri sanalgan. Biroq «Chelsi»dagi ish tajribasidan so'ng Klaudioning faoliyatida pasayish kuzatildi - u na «Valensiya» yoki «Parma», na «Roma» yoki «Yuventus» va na «Inter»da chinakam nom qozondi. Natijada o'z omadini Frantsiya ikkinchi ligasidan izlashga qaror qildi - uning xizmatlariga vaqtida kuchli hisoblangan  «Monako» qiziqish bildirgandi. Raneri Frantsiyadagi ilk mavsumidayoq monegasklarni elitaga olib chiqdi va keyingi yili mamlakatning vitse-chempioniga aylandi. Uning jamoasi faqat endi-endi duch kelgan yulduzlarni xarid qila boshlagan «PSJ»dan ortda qoldi.
Biroq klub boshqaruvida qayd etgan muvaffaqiyatlariga qaramay, rossiyalik Vadim Vasilev rahbarligidagi «Monako» vakillari italiyalikning ish uslubiga past baho berishdi. Oddiy aytganda, jamoa o'yini o'ta zerikarli ekanligini nazarda tutgan rahbariyat ro'yxotirlikni bir chetga surib, Raneriga chiqish eshiklarini ko'rsatib qo'ydi. Italyan mutaxassisi shundan so'ng Gretsiya milliy jamoasida qisqa muddat ish olib bordi va misli ko'rilmagan muvaffaqiyatsizlik oqibatida noshud murabbiyga aylandi-qo'ydi.
Ana shu pallada «Lester» klubi mutlaqo kutilmaganda, omadsiz Klaudio amakini tumanli o'lkaga qaytardi va uning zimmasiga «tulkilar»ni atigi premer-ligada olib qo'yishga urinish vazifasini yukladi. Raneri esa bu majburiyatni 100 chandon ortig'i bilan bajarmoqda. Axir liganing asosiy autsayderlaridan biri hisoblangan jamoa ayni paytga kelib, umuman boshqacha qiyofaga kirdi hamda yo'lida uchragan har qanday grandga bemalol saboq beryapti. Tabiiyki, voqealarning bunday rivoji Raneri obro'sini keskin oshirib yubordi.
Jeymi Vardi
O'sha vaqt: «Flitvud Taun» a'zosi va 5-divizionning eng yaxshi to'purari
Hozir: APLning bosh to'purari maqomiga da'vogar
Vardi haqidagi eng quyidan yuqoriga ko'tarilish ertagini hozirda deyarli hamma biladi. «Lester» bosh hujumchisi qiyofasini  endilikda mamlakatdagi barcha sport nashrlarida har kuni ko'rish mumkin. Uning uglevodorod tolasi ishlab chiqaruvchi fabrikada oddiy xizmatchi bo'lganiyu, APLning sara goleadorlari qatoriga kirish yo'lida qanday tarixni boshdan kechirganini esa, bugungi kunda barcha futbol muxlislari bir-birlariga erinmay hikoya qilib berishadi.
Bundan 4 yil oldingi mavqesiga kelsak, Jeymi 5-divizion (!) vakili -  «Flitvud Taun» klubida to'p surardi. O'shanda, Vardi shartnomaga imzo chekkan kuniyoq yangi klubi asosiy tarkibida  maydonga tushib, o'z hisobiga gol yozib qo'yish uddasidan chiqmadi, keyingi bahsda ham raqib darvozasini nishonga ololmadi. Lekin shundan so'ng ketma-ket 3 marta «dubl» qayd etib, to'purarlar poygasi peshqadamligini qo'lga oldi. Yakunda notanish hujumchi 31ta gol bilan liga bosh goleadori bo'ldi. Muhimi, uning samaradorligi «Flitvud Taun»ga juda asqotib, klub o'z tarixida ilk marta  Futbol ligasi yo'llanmasiga ega chiqdi. Mana, Jeymi endi eng nomdor va puldor klublarning doimiy e'tiborida turibdi.
Kasper Shmeyxel
O'sha vaqt: chempionship debyutanti
Hozir: APL peshqadamining asosiy darvozaboni
«Manchester Yunayted»ning afsonaviy posboni — Peter Shmeyxelning o'g'li hozirgi «Lester» faxriylaridan biridir. Kichik Shmeyxel «tulkilar» bilan chempionship o'rtamiyonasidan  APL etakchisigacha bo'lgan yo'lni mardonavor bosib o'tdi. To'g'ri, Kasperning faoliyati otasiniki kabi o'ta yorqin kechmayapti. Deylik, u yoshligida «Manchester Siti» tarkibidan joy ololmadi, ijara kelishuvlari asosida sarson yurdi, hattoki, 4-liga vakili «Notts Kaunti»da bir mavsum o'ynadi, «Lids»da omadsizlikka yuz tutdi...
Shunday ko'rgiliklardan keyingina o'sha payt «Lester»da ishlagan eski tanishi Sven-Yoran Erikssondan taklif oldi. Albatta, bu jamoadagi ishlari ham birdaniga silliq kechgani yo'q. Misol uchun, o'yinlardan birida atigi 30 soniya ichida 2 marta kartochka olib, barchani hayratlantirdi. Hakam unga birinchi «sariq»ni 11 metrli zarba ijrosidan oldin to'pni «nuqta»dan surib qo'ygani uchun ko'rsatdi. Keyin esa Kasper petaltidan gol qo'yib yuborib, to'pni stadion tashqarisiga tepib yuborishga urindi va bu xatti-harakati uchun ikkinchi sariq kartochkani olib, jamoasini qiyin ahvolda qoldirdi.  Lekin eng muhimi shuki, kichik Shmeyxel ortda qolgan 4 mavsum davomida «Lester»ning birinchi raqamli futbolkasini hech kimga bermadi. Joriy mavsum esa, nihoyat, tomirida APL tarixidagi eng yaxshi kiperlardan birining qoni oqayotganini isbotlashga tushdi.
Kristian Fuks
O'sha vaqt: «Shalke» himoyachisi, ChL ishtirokchisi
Hozir: «Lester» asosiy tarkibining almashtirilmas futbolchisi
Fuks yuqori darajada o'ynash bobida ulkan tajribaga ega. Avstriyalik himoyachi mavsum-2010|2011da bundesligada shov-shuv ko'targan «Maynts»dagi ajoyib o'yinlari orqali «Shalke» nazariga tushdi va yangi klubida ham osongina o'z o'rnini topdi. Ya'ni gelzenkirxenliklar boshlang'ich tarkibida darhol chap qanot himoyachisi pozitsiyasini egalladi. To'g'ri, Kristian yuqori tezlikka ega emas va asosan to'g'ri joy tanlashi hisobiga raqibidan ustun chiqadi. Shuningdek, standart vaziyatlarda ko'p naf keltiradi. Oradan 2 yil o'tib, Fuks «Shalke» bilan Germaniya bundesligasi bronza medalini yutdi. O'shanda klubning finishga  «Bavariya» va «Borussiya»dan so'ng etib kelishi hamda ChLda 1|8 finalgacha borishida avstriyalik himoyachining xizmatlari katta bo'lgandi. Endi esa Fuks «Lester» himoyasida tartib o'rnatmoqda imkon darajasida.
Davomi InterFUTBOL gazetasi blogida.
— deya xabar beradi uff.uz nashri.