«Real»da mojaro: futbolchilar klubda faoliyat yuritayotgan tibbiyot xodimlarining iste'fosini talab qilishmoqda, rahbariyat esa shikoyatlarga e'tibor qaratmayapti. Vaholanki, jamoada jarohatlar epidemiyasi avj olgan. Mavsum boshlanganidan beri o'yinchilar sog'lig'i bilan bog'liq 20ta holat ro'y berdi. Quyida shu haqda gap boradi.
«Qirollik klubi» navbatdagi tibbiy hisobotni taqdim etdi. Lat eganlar qatoriga Karim Benzema qo'shildi. Bu fevraldan beri kuzatilayotgan uchinchi jarohat bo'lsa, mavsum boshlanganidan buyon yigirmanchisi. Xullas, hisobdan allaqachon adashib ulgurildi...
Benzemaning jarohati «dard ustiga chipqon» bo'ldi. Frantsiyalik forvard yaqinda umumiy guruh mashg'ulotlariga qo'shilib, «Atletiko»ga qarshi bahsda o'ynagandi. Oradan ikki kun o'tar-o'tmas klub noxush xabar tarqatdi: «Karimda mushaklar borasida muammo tug'ildi». Mazkur holat jamoa kiyinish xonasidagilarni ranjitmay qo'ymadi.
Shu tariqa, futbolchilarda shifokorlarga nisbatan ishonch yo'qoldi. Mavjud vaziyat jamoadagi muhitga salbiy ta'sir ko'rsatmoqda. Etakchi o'yinchilar «Real» prezidenti Florentino Peresga murojaat etib, shifokor Xesus Olmoni ishdan bo'shatishini so'radilar. «Qirollik klubi» rahbari esa buni yulduzlarning navbatdagi xarxashasiga yo'ydi.
Keyinchalik Rafael Benitesning kelishi o'yinchilar sa'y-harakatlarini tamomila yo'qqa chiqardi. Ispaniyalik mutaxassis shifokorlar shtabini to'liq qo'llab-quvvatlab, o'z navbatida, ayrim qaysar shogirdlarini o'zicha jazoladi. Bir necha oy tibbiyotchilardan qutulishga uringan futbolchilar noqulay ahvolda qoldilar.
Muammo shu qadar jiddiy tus oldiki, bir safar Krishtianu Ronaldu matbuotdagi chiqishi orqali vaziyatga qisman to'xtaldi. Uning aytishicha, futbolchilarda ko'ngildagidek tayyorgarlik ko'rib, mavsumga optimal ko'rinishda etib kelish imkoniyati yo'q ekan. «Real» kiyinish xonasidagilar Zayniddin Zidanning portugaliyalik shogirdini to'liq qo'llab-quvvatlashiga ishonishadi. Ammo Peres-ning hamon chora ko'rmayotgani ko'pchilikni hayratlantirmoqda.
O'tgan yili futbolchilar klub bosh direktori Xose Anxel Sanchesga murojaat qilib, Olmo bilan bog'liq muammo haqida so'z ochishdi. O'z navbatida, o'yinchilarning qaysarlik qilmayotgani, vaziyat chindan ham jiddiy ekanligini tushuntirishdi. Anxel ulardan sabrli bo'lishni so'rab, yozda muammoni hal qilishini aytgan. Futbolchilar ta'tildan qaytgach, klub ikki nafar fizioterapevtni ishdan bo'shatganidan xabar topishdi. Ulardan biri aynan jarohatlanganlarning tiklanishiga mas'ul edi.
Davomi InterFUTBOL gazetasi blogida.
— deya xabar beradi uff.uz nashri.