Shu kunlarda Birlashgan Arab Amirligining Dubay shahrida engil atletika bo'yicha Gran Pri turkumiga kiruvchi yirik xalqaro turnir o'tkazilmoqda.
E'tiborlisi, nufuzli musobaqaning dastlabki kunidayoq uch nafar hamyurtimizning g'alabasi sharafini muzaffar bayrog'imiz sarbaland ko'tarildi.
Jumladan, 100 metr masofaga yugurish bahslarida eng yuqori natijani (00:11,30 soniya) qayd etgan Mansur Abdurashidov shohsupaning eng yuqori pog'onasiga ko'tarilgan bo'lsa, nayza uloqtirish sektorida Nozimaxon Qayumova 42 m. 79 sm. natija bilan birinchi o'rinni egalladi.
1500 metr masofaga o'tkazilgan yugurish musobaqalarida Vatanimiz sharafini himoya qilgan Ma'rufjon Murodullaev belgilangan masofani 4 daqiqa-yu 03 soniyada bosib o'tib, oltin medalni qo'lga kiritish bilan birga Osiyo rekordini ham yangiladi.
Endilikda sportchilarimiz 200, 400, 800 m. masofalarga yugurish, balandlikka sakrash, nayza va disk uloqtirish baxslarida ishtirok etadilar.Mazkur musobaqalarda ham yurtdoshlarimizga omad va zafarlar tilab qolamiz.
Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.