O'zbekiston - Filippin o'yini oldidan o'tkazilgan matbuot anjumanida O'zbekiston terma jamoasi bosh murabbiyi Samvel Babayan va yarim himoyachi Server Jeparov ishtirok etdi. Anjuman boshida murabbiy va futbolchi fikrlarini bildirib o'tishdi.
Samvel Babayan: Eng avvalo jurnalistlarga salomimni yo'llamoqchiman. Ertaga Filippinga qarshi juda muhim o'yin bo'ladi. Bu jamoani juda hurmat qilamiz, uni ancha kuchli murabbiy boshqarmoqda. Bizning maqsadimiz - g'alaba qozonish.
Server Jeparov: Ertaga hammamiz uchun juda muhim o'yin bo'ladi. Bu o'yinda bor kuchimizni ko'rsatib, imkon qadar g'alaba qozonishga harakat qilamiz.
- Hamma futbolchilarni tarkibda jamlay oldingizmi?
- Hamma etib kelgan va ertaga bo'ladigan o'yinga tayyor.
- Ertaga muxlislar uchun ham yirik hisobdagi g'alabani qo'lga kiritish juda muhim. Bunga tayyormisiz?
- Biz uchun eng avvalo natija muhim ahamiyatga ega. G'alaba qozonsak bo'lgani, o'shanda hammasi joyida bo'ladi.
- Mavsum boshlangan vaqtda klublarimiz ishtirokidagi o'yinlarda ko'rdikki, futbolchilarning jismoniy tayyorgarligi u qadar yaxshi emas. Hozir vaziyat qanday?
- Chempionlar ligasida maydonga tushgan futbolchilar juda yaxshi holatda. Legionerlarga kelsak. ular ham tayyor. Bu borada muammo yo'q.
- Sardor Mirzaevning qaysi jihati sizga ma'qul kelmadi?
- Sardor juda yaxshi o'yin namoyish qilmoqda. Shu sababli ham termaga chaqirgan edik. Ammo u harakat qiladigan hujum chizig'ida shundoq ham kuchli futbolchilar bor. Shu sababli undan hozircha foydalanmay turishga qaror qildik. Sardorni kuzatishda davom etamiz.
- Sizda darvozabonlar borasida katta tanlov imkoni bor. Ertaga kim maydonga tushadi, yana Lobanovmi?
- Bunisini endi bugun bo'ladigan so'nggi mashg'ulotda aniqlab olamiz.
- Filippin bosh murabbiyi O'zbekistonni juda kuchli deb atadi? Bu borada nima deya olasiz?
- Filippinda bo'lgan o'yindan so'ng Filippin jurnalistlari mendan o'z jamoasi kuchini baholashni so'ragan edi. Men o'shanda KXDR bilan bo'ladigan o'yinda bunga baho berishlarini aytgan edik. Darhaqiqat, ular bu o'yinda o'zlarini ko'rsata oldilar. Ularni juda yaxshi murabbiy boshqarmoqda. Biz esa yana g'alaba qozonishga harakat qilamiz. O'zbekiston terma jamoasida raqib bosh murabbiyi aytgan gaplar esa, shunchaki hiyla xolos.
- "Paxtakor" stadionidan "Bunyodkor"ga ko'chish tashabbusi kimdan chiqdi?
- Terma jamoa o'yinlari avvaldan "Bunyodkor"da o'tishi rejalashtirilgan edi. Ammo o'sha vaqtda maysa holati yaxshi bo'lmaganidan o'yinlar vaqtincha "Paxtakor"ga ko'chirilgan edi. "Bunyodkor" arxitektura va injenerlik ishi jihatidan eng muhtasham inshootlardan hisoblanadi. Shunday ekan, terma jamoa o'yinlari aynan shu erda o'tishi juda to'g'ri, deb hisoblayman.
- Savolim Server Jeparovga. Nima uchun burchak to'pi tepganda pastlatib tepasiz? Futbolchilarning elkasi emas, boshiga etkazib bersangiz bo'lmaydimi to'pni?
- Samvel Babayan: Server to'pni elkadan boshga chiqarishi uchun mashg'ulotlar vaqtida ishlaymiz.
Server Jeparov: Har doim ham o'ylagan ishing amalga oshavermaydi. Shu sababli ham biz mashg'ulot o'taymiz va harakatlarimizni sayqallaymiz. Agar hozir sizni men tepadigan burchak to'plari u qadar qanoatlantirmasa, umid qilamanki ertaga bo'ladigan o'yindan keyin fikringiz o'zgaradi.
- Safarda 5:1 hisobida g'alaba qozongan edingiz. Ertaga ham shunday natijaga umid qilyapsizmi?
- Biz havolanib ketmaganmiz va bizni har qanday hisobdagi g'alaba qanoatlantiradi.
- Vodiy jamoalaridan futbolchilar chaqirilmayapti. Ularni ham kuzatyapsizmi?
- Biz geografik jihatdan xududlarga bo'linmaganmiz. O'zbekiston fuqarosi bo'lgan har qanday futbolchiga termada o'ynash imkoni bor. Agar "Neftchi", "Navbahor", "Nasaf" va "Qo'qon-1912"dan kimdir o'zini ko'rsatsa. uni albatta termaga chaqiramiz.
- Raqibni o'rganishda qanday uslublardan foydalandingiz?
- Biz raqibni o'rganishda barcha uslublardan foydalandik.
- Asosiy kurash kelgusi bosqichda bo'ladi. Bunga tayyormisiz?
- Men bu savolga javob berishni istamayman. Keyingi bosqichga hali chiqish kerak. Biz uchun eng muhim o'yin - ertaga bo'ladigan o'yin.
- Muxlis o'zi kelib savol bera olmaydi. Shu sababli ularning e'tirozini etkazmoqchiman. Muxlislarda shunday taassurot borki. Stanislav Andreev har qanday sharoitda ham maydonga tushmoqda. Muxlislar fikriga ko'ra Andreevni xorij klublariga sotish uchun har doim maydonga tushiryapsiz ekan? Bunga qanday qaraysiz?
- Men hozir "Paxtakor"da mutlaqo ishlamayapman va Andreevni sotishim ham mumkin emas. Yana bir gap aytishim kerak, Andreev haqida savol berilmas ekan, matbuot anjumani ham o'tmagan hisoblansa kerak. Har doim Andreev masalasi ko'tariladi. Biz terma jamoaga chaqiradigan futbolchilarning to'rt jihatiga e'tibor qaratamiz, jismoniy holati, mahorati, bizning g'oyalarimizni tushunishi va insoniyligi.
- Tarkibda oldingi o'yinlarga qaraganda o'zgarishlar bo'ladimi?
- Tarkib borasida 90 foiz bir qarorga kelib bo'lganmiz. Yana bir mashg'ulot davomida o'zgarishlar bo'lishi mumkin.
- Futbolchilarga g'alaba uchun mukofot puli beriladimi?
- Bu haqida biror narsa deya olmayman.
- Ha, yoki yo'q deb javob bersangiz kifoya.
- O'FF rahbariyati boshchiligida futbolchilarga hamma sharoit yaratilgan. Ammo bu o'rinda gap mukofot puli haqida ham ketmayapti. Mukofot puli bo'lgan yoki bo'lmagan taqdirda ham futbolchilar bor kuchi bilan g'alaba uchun harakat qiladilar...
— deya xabar beradi uff.uz nashri.